DILI, STLTIMORLESTE.com — Hospital Nasional Guido Valadares (HNGV) sei rekruta pesoál saúde ho transparénsia, meritokrasi no igualdade, tuir prosedimentu Funsaun Públika.
HNGV sei rekruta pesoál saúde liuhusi koordenasaun ho Ministériu Saúde no Komisaun Funsaun Públika.
Diretor Servisu Apoiu Diagnóstiku no Terapêutiku HNGV, Vidal de Jesus Lopes, hatete prosesu sei hala’o tuir prosedimentu ofisiál.
Anúnsiu públiku kona-ba vagas sei publika hosi 7 to’o 17 Setembru 2026. Kandidatu sira bele submete dokumentus atu partisipa selesaun.
“Prosesu ne’e sei enfatiza transparénsia, meritokrasi no igualdade, atu evita favoritismu ka interferénsia iha selesaun kandidatu,” dehan Vidal ba STL iha nia servisu fatin HNGV, Dili, (02/09/2026).
Nia hatete, prosesu selesaun sei hala’o iha faze tolu: selesaun dokumentus, teste eskrita no entrevista ba kandidatu.
Teste eskrita sei hala’o liuhusi sistema Funsaun Públika, ho kandidatu ida-idak halo teste uza komputador.
Vidal hatete, kandidatu ne’ebé pasa faze hotu sei konsidera tuir rezultadu no kriteria ofisiál ne’ebé determina ona.
Kriteria no requisitos ba vagas sei publika, atu públiku bele asesu informasaun no komprende prosesu rekrutamentu ne’ebé hala’o.
Nia esplika, HNGV presiza rekursu umanu tanba nesesidade servisu iha área saúde no aumentu demanda servisu.
“Timor-oan hotu ne’ebé kumpre kriteria tenke hetan oportunidade hanesan atu aplika no partisipa iha prosesu,” dehan Vidal.
Vidal mos hatete, sistema teste Funsaun Públika sei ajuda asegura prosesu rigorozu, transparente no bazeia ba rezultadu kandidatu.
Graduada Universidade da Paz, Amelia Goncalves husu atu prosesu rekrutamentu lao ho justisa, atu Timor-oan hotu bele kompete onestu.
“Rekrutamentu tenke justu ba Timor-oan hotu, labele iha favoritssmu no familiarismu iha prosesu laran,” dehan Amelia.
Nia husu ekipa selesaun atu hala’o teste no selesaun ho loloos, tanba ema barak hakarak hetan oportunidade servisu.
Enkuantu, Juventude Partidu FRETILIN, Ananias Fatima, hatete rekrutamentu labele envolve familiarismu, atu oportunidade servisu asesível ba ema hotu.
Nia konsidera prosesu rekrutamentu transparente no justu sei fó oportunidade ba ema hotu atu servisu no kontribui ba nasaun.
(dom)
