DÍLI, STLTIMORLESTE.com — Governu Timor-Leste prepara infraestrutura no define prioridade dezenvolvimentu iha kapitál Dili, atu suporta preparasaun ba Prezidénsia ASEAN iha 2029.
Primeiru-Ministru Kay Rala Xanana Gusmão fó informasaun ne’e ba jornalista hafoin enkontru ho Prezidente Repúblika José Ramos-Horta, iha Palásiu Prezidensiál Nicolau Lobato, Bairru Pité, Dili, Kinta-feira (29/10/2026).
Xanana esplika katak, Governu define ona prioridade infraestrutura balun ne’ebé presiza atensaun, atu prepara Timor-Leste ba responsabilidade lidera organizasaun rejionál ASEAN iha 2029.
“Prioridade dahuluk mak área Habibie to’o Kristu Rei, ne’ebé ita presiza hadi’a, tanba importante ba atividade sosiál no komunidade,” Primeiru-Ministru hatete.
Nia temi mós área Kristu Rei nu’udar fatin ne’ebé komunidade uza ba kazamentu, batizmu, aniversáriu no atividade sosiál seluk. Tanba ne’e, hadi’a infraestrutura iha área ne’e sai parte importante husi preparasaun.
Prioridade daruak mak hadi’a estrada prinsipál husi Nicolau Lobato ba Palásiu Prezidensiál, ne’ebé tuir Xanana, presiza reabilitasaun tanba kondisaun estrada la di’ak durante tinan barak.
Primeiru-Ministru hatete katak, estrada no infraestrutura prinsipál sira presiza hetan atensaun, atu fasilita movimentu no asegura asesu ba fatin importante sira durante atividade ofisiál.
Preparasaun ba Prezidénsia ASEAN la’ós de’it kona-ba infraestrutura fízika, maibé mós presiza planeamentu, koordenasaun entre instituisaun públika sira, no preparasaun rekursu umanu atu organiza reuniaun no atividade rejionál.
Timor-Leste tama nu’udar membru ASEAN iha 2025, depois prosesu adezaun ne’ebé kleur. Membruzaun ne’e loke oportunidade foun ba kooperasaun ekonómika, diplomátika, seguransa rejionál no dezenvolvimentu sustentável.
Ho responsabilidade Prezidénsia ASEAN iha 2029, Timor-Leste sei iha oportunidade atu hatudu kapasidade diplomátika no organizasionál, hametin relasaun ho nasaun membru sira, no promove interese nasionál iha nivel rejionál.
Infraestrutura di’ak iha kapitál bele ajuda fasilita transportasaun delegasaun, asesu ba fatin reuniaun, no movimentu vizitante sira. Preparasaun ne’e mós bele fó impaktu pozitivu ba atividade ekonómika no setór servisu, inklui transporte, alojamentu no turizmu.
Área Kristu Rei, nu’udar fatin ne’ebé iha importánsia turístika no sosiál, bele sai parte husi esforsu atu hadi’a imajen kapitál Dili ba vizitante Nasionál no Internasionál.
Preparasaun ba Prezidénsia ASEAN iha 2029 sei sai oportunidade importante ba Timor-Leste atu hatudu prontidaun institusionál, promove dezenvolvimentu nasionál no hametin pozisaun iha rejiaun Sudeste Aziátiku.
(eme)
