DILI, STLTIMORLESTE.com — Primeiru-Ministru (PM), Kay Rala Xanana Gusmão aprezenta ba Prezidente Repúblika José Ramos-Horta rezultadu desizaun sira husi Konsellu Ministrus, inklui aprovasaun dekretu-lei kona-ba pagamentu eletróniku.
Enkontru semanal ne’e realiza iha Palásiu Prezidensiál Nicolau Lobato, Bairru Pité, Dili, Kinta-feira (29/10/2026), atu informa Prezidente kona-ba desizaun governu nian.
Xanana hatete katak Konsellu Ministrus aprova dekretu-lei ida ne’ebé estabelese rejime utilizasaun obrigatória instrumentu eletróniku ba pagamentu no kobransa.
“Aprovasaun dekretu-lei kona-ba utilizasaun obrigatória instrumentu eletróniku ba pagamentu no kobransa ne’e importante tebes,” afirma Primeiru-Ministru.
Nia mós esplika katak, medida ne’e sei ajuda hadi’a kontrolu finanseiru, liuliu iha fatin sira ne’ebé iha atrasu pagamentu durante fulan haat to’o neen.
Aleinde ne’e, Governu aprova medida apoiu ba Banku Nasionál Dezenvolvimentu, atu hahú fó kréditu ba mikroempreza no empreza ki’ik iha tinan oin.
Xanana mós temi reorganizasaun administrativa iha Rejiaun Administrativa Espesiál Oe-Cusse Ambeno (RAEOA) nu’udar asuntu importante ba hadi’a jestaun no dezenvolvimentu institusionál.
Nia subliña katak, reorganizasaun ne’e sei sai baze ba fortalese kapasidade instituisaun nian, inklui preparasaun ba eleisaun iha tinan oin.
(eme)
