DÍLI, STLTIMORLESTE.com – Diretór Nasionál Servisu Prizionál no Reinsersaun Sosiál (DNSPRS), Delfio Alves hato’o tristeza tanba mate Cristiano Salsinha, eis-Diretór Prizaun Gleno, ne’ebé hakotu iis iha 28 Outubru 2026, ho idade tinan 54.
Delfio Alves hato’o informasaun ne’e ba jornalista sira iha Kaikoli, Kinta-feira (29/10/2026), no hateten katak, DNSPRS sei fó apoiu ba família matebian durante prosesu funerál no trata asuntu administrativu relevante sira.
“Ami lakon ema ida ne’ebé potensial tebes, tanba durante nia servisu, nia hala’o knaar ho responsabilidade. Ami triste tebes tanba lakon kolega no família lakon membru ida,” dehan Delfio Alves.
Alves hateten katak, DNSPRS sei servisu hamutuk ho família atu fasilita prosesu funerál. Konsellu Veteranu Munisípiu Ermera mós fó apoiu, inklui fasilidade ambulánsia veteranu nian no transporte atu lori matebian ba nia rezidénsia.
Cristiano Salsinha mai husi Munisípiu Ermera, Postu Administrativu Ermera Vila, no husik hela oan na’in hitu.
Durante nia karreira, Salsinha hahú servisu hanesan guarda prizionál iha tinan 2000. Nia kontinua avansa iha servisu, hahu husi supervizór, ofisiál guarda prizionál, to’o asume kargu Diretór Prizaun Gleno.
Depois, nia servisu nu’udar xefe Departamentu Formasaun, fila fali ba kargu Diretór Prizaun Gleno no ikusmai kontinua servisu iha departamentu to’o nia mate.
Tuir informasaun ne’ebé DNSPRS fó, Salsinha monu iha fatin hariis iha loron Sábadu, hafoin evakua kedas ba Hospital Nasionál Guido Valadares (HNGV). Maibé, nia ikusmai hakotu iis iha 28 Outubru 2026.
Kona-ba direitu no benefísiu ne’ebé família matebian bele simu, Alves hateten katak DNSPRS sei servisu hamutuk ho Komisaun Funsaun Públika no entidade relevante sira atu analiza asuntu administrativu no estatutu seguransa.
DNSPRS kontinua fó atensaun ba família matebian, inklui apoiu durante prosesu funerál no akompañamentu ba asuntu administrativu ne’ebé presiza rezolve.
Informasaun ne’ebé STL asesu hatudu katak, matebian mai husi Munisípiu Ermera, no oras ne’e dadaun matebian to’o ona iha nia rezidénsia, iha Ermera, atu kontinua hala’o serimónia kulturál tuir kostume no tradisaun lokál.
Serimónia ne’e hala’o nu’udar parte husi prosesu tradisionál ne’ebé família no komunidade lokal hala’o ba matebian, tuir prátika kulturál ne’ebé eziste iha sira-nia komunidade.
(ter)
