DILI, STLTIMORLESTE.com — Pasiente preokupa tanba kadeira iha área espera konsultasaun Hospital Nasional Guido Valadares (HNGV) la to’o, obriga balun hamriik hein.
Pasiente João de Jesus husu administrasaun HNGV atu aumenta kadeira iha área espera konsultasaun.
“Hau preokupa tanba kadeira la to’o, nune’e ami tenke hamriik hein konsultasaun ho doutór,” dehan João ba STL iha HNGV, Dili, Kuarta (02/09/2026).
Nia hatete, situasaun ne’e bele prejudika pasiente sira, liuliu sira ne’ebé mai ho kondisaun moras no presiza fatin atu hein.
João rekomenda ba Governu no administrasaun HNGV atu aumenta kadeira, hodi melhora kondisaun pasiente iha área espera konsultasaun.
Familia pasiente, Carmelita Soares, hatete disponibilidade kadeira depende ba númeru pasiente ne’ebé mai konsultasaun.
“Kuandu pasiente barak mai, fatin atu tur la to’o, tanba kadeira ne’ebé disponivel menus,” dehan Carmelita.
Nia hatutan katak, númeru pasiente kontinua aumenta, nune’e fasilidade hospital mos presiza aumenta, inklui kadeira iha área espera.
Diretor Servisu Apoiu Diagnóstiku no Terapêutiku HNGV, Vidal de Jesus Lopes hatete, HNGV nu’udar hospital referál ne’ebé simu pasiente barak.
Nia esplika, HNGV simu pasiente husi hospital no unidade saúde seluk, liuliu kazu sira ne’ebé presiza tratamentu espesializadu.
Vidal hatete, HNGV sei buka meius atu hadi’a fasilidade, liuliu iha Departamentu Konsultasaun Externa, hodi garante kondisaun dignu.
“Sei nafatin buka meius atu fó tratamentu dignu ba sira. Ba oin, sei tau planu hodi hadi’a kondisaun,” dehan Vidal.
(dom)
