DILI, STLTIMORLESTE.com – Delegasaun Iémen rona esperiénsia Timor-Leste (TL) kona-ba rekonsiliasaun, mediasaun no negosiasaun hodi aplika iha sira-nia rai.
Prezidente Repúblika, José Ramos Horta, simu vizita kortezia husi delegasaun Iémen ne’ebé akompaña husi Sekretáriu-Jerál g7+, Hélder da Costa.
Delegasaun ne’e hala’o misaun estudu durante loron lima iha Timor-Leste, hodi hasoru órgaun soberania no aprende kona-ba prosesu dame.
Durante enkontru, Ramos Horta fahe esperiénsia kona-ba negosiasaun diplomátika no rekonsiliasaun ne’ebé ajuda Timor-Leste atinje independénsia.
Xefe Estadu apela delegasaun atu mantein unidade no promove diálogu inkluzivu entre parte hotu iha Iémen.
Nia subliña katak rezolve konflitu naruk presiza empátia, kompromisu no komprometimentu hamutuk ba interese nasionál.
Hélder da Costa hatete, delegasaun Iémen mai aprende esperiénsia Timor-Leste kona-ba rekonsiliasaun, atu bele aplika iha sira-nia rai.
“Sira mai aprende esperiénsia Timor-Leste hodi lori no buka aplika iha sira-nia rai,” dehan nia.
Hélder hatete, delegasaun durante loron lima sei hasoru lideransa no órgaun soberania Timor-Leste.
Delegasaun ne’e mós hasoru Prezidente Parlamentu Nasionál, Vise Primeiru-Ministru Francisco Kalbuadi Lay no lider nasionál Mari Alkatiri.
Xefe Delegasaun Iémen, Al-Qasimi hato’o agradesimentu ba Prezidente Republika Jose Ramos Horta nia esperiénsia iha mediasaun internasionál.
Nia hatete, delegasaun hetan inspirasaun husi Timor-Leste nia prosesu, no fiar katak dame posível liuhusi diálogu.
Ramos-Horta hatete, delegasaun ho membru 30 mai rona esperiénsia Timor-Leste kona-ba rekonsiliasaun, negosiasaun no mediasaun.
Sira mós hakarak komprende oinsá Timor-Leste halo negosiasaun ho Indonézia no ONU durante prosesu ba referendum.
“Buat hotu depende ba lideransa. Falansu dame iha Médiu Oriente mos mai husi lideransa,” dehan nia.
PR Horta hatete, Timor-Leste hasoru violénsia antes no durante referendum, maibé konsege kontinua prosesu ba independénsia.
Nia mós temi papel lideransa iha negosiasaun ho Indonézia no ONU durante períodu tranzisaun ba independénsia.
PR Horta hatete, Xanana Gusmão iha tempu ne’ebá sai figura importante ne’ebé ONU no Portugal rona nia pozisaun.
Nia mós refere ba Bispu Belo, ne’ebé apela atu adia konflitu, enkuantu Xanana defende kontinuidade prosesu.
PR Horta hatete, forsa akontanamentu FALINTIL mós sai parte importante iha estratéjia ba prevene konflitu no hakat ba rekonsiliasaun.
(eme)
