MANATUTO, STLTIMORLESTE.com — Dalan protokolu Manatuto-Baucau sei taka provizoriu durante loron tolu, hodi fasilita serimónia transladasaun restu mortais Monsenhor Martinho da Costa Lopes.
Desizaun ne’e hetan akordu entre Autoridade Munisípiu Manatuto no PNTL, relasiona ho serimónia nasional iha Laleia.
Sekretáriu Asuntu Administrasaun no Finansas Munisípiu Manatuto, Patricio Quintão, hatete dalan sei taka husi loron 1 to’o loron 3.
“Ita informa ba públiku katak, relasiona vizita urna Monsenhor Martinho da Costa Lopes, dalan protokolu sei taka,” hatete Quintão.
Nia hatete, dalan sei taka depois urna liu iha oras 09:00, husi parte Obratu to’o Ponte Laleia.
Durante taka dalan, PNTL sei orienta veíkulu sira atu uza rota alternativu liu husi mota laran no sai iha igreja.
“Dalan sei taka iha loron 1 to’o loron 3 Setembru, no ita sei loke fali iha loron 4 Setembru dader,” nia informa.
Komandante PNTL Munisípiu Manatuto, Superintendente Xefe Polísia Joni Viana das Regras, hatete PNTL sei mobiliza membru sira.
Mobilizasaun ne’e atu asegura seguransa durante prosesu transladasaun urna no serimónia iha Postu Administrativu Laleia.
“Ita konvoka membru Polísia atu fornese seguransa ne’ebé adekuadu ba vizita urna Monsenhor Martinho da Costa Lopes iha Laleia,” nia hatete.
Joni hatete, PNTL sei mobiliza efetivu 60 pesoas, ne’ebé fahe ba eskuadra neen, durante loron 2 no 3.
Nia husu públiku, liuliu komunidade iha Manatuto, atu kolabora ho PNTL hodi mantein seguransa, dame no estabilidade.
“Komando PNTL Manatuto garante ambiente hakmatek no seguru durante vizita espesiál ba urna Monsenhor Martinho da Costa Lopes,” nia afirma.
(jen)
