DILI, STLTIMORLESTE.com – Liurai Bobonaro husu Prezidente Republika Jose Ramos Horta kontinua kandidata ba Prezidente Republika, hatan ba kestaun ne’e Prezidente Republika hatete, seidauk tempu, sei konsulta ho Primeiru Ministru Xanana Gusmão.
Prezidente Republika Jose Ramos Horta ba jornalista iha Palasiu Prezidensial Nicolau Lobato Bairo Pite, Kuarta (02/09/2026) hatete, foin lalais Liurai Bobonaro Duarte Barros mak husu Prezidente Republika atu kandidata aan tan maibe seidauk tempu, no sei konsulta ho Primeiru Ministru, la signifika ba tur oras barak iha odamatan hodi koalia assuntu ne’e maibe sei rona hanoin ruma.
“Seidauk too tan eleisaun hau sei hein lai, depois sei rona maun boot laos hein maun boot atu konvida hau, hau laba tuur iha maun boot nia odamatan Lecidere ne’eba, tuur nia fuma fuma lapara hau tolan tan nia sigaru suar ne’e, foin dadauk hau ho Prinseza Boutang tuur los iha maun boot nia sorin nia hatete ba hau, katak hau ohin fuma lubuk ida lost anba Primeiru Ministru fuma nia mak tolan depois hau hatete ba Ministra ne’e semana semana nia mai enkontru ho hau ami loke Janela odamatan hotu maibe sei sente suar tabako nia, Hau laba tuur iha ne’eba oras hira nia laran hein atu koalia ho nia lae? Ba hau pronto atu serbi iha ne’ebé ne’ebé, Prezidente laos uniku hau iha 2012-2022 hau laos prezidente, laos Primeiru Ministru, laos ministru laos embaixador halo serbisu seluk sempre preokupasaun ho rai ne’e,” dehan PR Horta.
Prezidente Republika hatete, ba nasaun nia diak, nia pronto atu kontribui, “ Tantu 2027 ba oin mos hau pronto hanesan 2012 hau marka pontualidade iha ne’eba entrega mandatu ba Taur Matan Ruak, hakoak nia agradese ba nia Pay, Mae, ne’ebé hakiak oan ida ke diak tebes entrega ba luta,” katak Horta.
Xefe Estadu hatete, tinan 2022 Prezidente Lu Olo mak entrega Poder ba nia maske Prezidente Lu olo too tarde los iha ne’eba 30 minutu ou 40 minutu tarde maibe hotu hotu hein ho respeitu hakoak, maiu 2027 PR Ramos pronto atu entrega ba Prezidente foun.
“Komforme se se ke maun boot hanoin diak liu ema seluk mak kandidata aan nemos diak, maibe mesmo nia husu hau la signifika hau simu hau sei hanoin didiak lai, tanba serbisu ne’e importante tanba simeira ASEAN ita mak kaer hau mos preokupa eleisaun 2028 hau hanoin Maun Xanana tenke kontinua tan tinan 5 iha 2028,” dehan PR Horta.
PR Horta dehan, lolos nia labele hatete tanba nia neutral maibe bele karik serbisu hamutuk ho partidu seluk kumforme Primeiru Ministru mak hatene.
Antes ne’e Liurai Bobonaro, Duarte Barros Prezidente Republika Jose Ramos kontinua kandidata an ba Prezidente Republika nune’e bele lidera ASEAN iha 2029.
Liurai Bobonaro hatete nia rona deklarasaun Prezidente Republika husi televizaun no lee iha jornal Prezidente dehan katak lakohi kandidata an ona ba Prezidente, maibé tuir nia Timor foin tama ASEAN tanba ne’e nia enome Liurai Bobonaro husu tan Prezidente Republika Jose Ramos Horta kandidata an ba tinan oin nune’e iha tinan 2029 bele lidera ASEAN tanba foin TL tama ASEAN.
“Laos dehan Timor Leste ema laiha atu ukun lae? Ema barak Timoroan iha S1,S2, S3, barak no Timor Leste iha veteranus barak bele ukun maibé presiza ema ida hanesan Jose Ramos Horta para mundu mos bele koinese Timor Leste,” dehan Veteranus.
Nia hatete maske nia hanesan liurai Bobonaro no povu Bobonaro hakarak Prezidente kandidata an maibé ida ne’e povu mak sei hili iha eleisaun Prezidensial, laos liurai mai tula liman deit lae, uluk ne’e oinseluk maibé agora demokrasia,
“Maibé ida ne’e fila fali ba nia nain rasik maibé se nain hakarak kandida an ami Bobonaro sei reforsa apoiu se lakohi ita buka meius para hare’e seluk, ema iha maibé buka meius para labele halo Timor nia naran iha mundu, maibé se kontinua kandidata an populasaun Bobonaro no agora ema hare’e ona katak Prezidente husi enome Prezidente CNRT mak apoiu nia hodi sai Prezidente nia ukun ida ohin loron ita hare’e Timor atu nabilan lanabilan neneik bebeik 5 anos mai tan Timor bele nabilan karik,” katak nia.
(eme)
