DILI, STLTIMORLESTE.com – Prezidente Republika (PR), Jose Ramos Horta hatete, prontu apoiu komunidade vulnerável ne’ebé Autoridade lokal husi Suku Afaloicai, Postu Administrativu Uatulari, Munisipiu Viqueque rekoila ona.
Prezidente Republika Jose Ramos Horta hatoo kestaun ne’e ba Jornalista iha Palasiu Prezidensial Nicolau Lobato, Bairo Pite Kuarta (02/09/2026) hatete, nia pronto atu apoiu komunidade vuneravel ne’ebé hatoo husi autoridade sira.
“Hau sempre prontu, hau sempre hatete ba sira iha ne’eba iha osso hau hatete favor imi rona karik hatene familia ruma ke moris aat los avija kedas hau simu naran simu video ruma hau haruka kedas hau nia staft, foin dadauk hau haruka kedas ne’e laos hein ka saida hau simu ohin kalan ohin kalan kedas lojistika sira simu kedas imformasaun loron ida liu sira aranka ona ba iha ne’eba ba haree lori kedas sasan depois ita haree saida tan mak halo, halo uma ida ka kios ida ba sira komforme,” dehan Prezidente Republika.
Prezidente Republika hatete, Governu halo nia serbisu makaas liu husi Ministeriu solidaridade sosial no Prezidente Republika halo ne’e hanesan komplementa, nomos Visi Primeiru Ministru Mariano Sabino halo uma ba ema kiak sira.
Atividade ne’e barak laos deit husi Prezidensia Republika nia, no Prezidente halo lalais liu laos tuir biokrasia oin oin bainhira halo konstrusaun uma ida ba ema vuneravel ida fulan rua ka tolu remata ona.
Foin lalais Xefe Suku Afaloicai, Cezario Nascimento Pires Postu Administrativu Uatulari, Munisípiu Viqueque, hatete sira identifika komunidade uma-kain 16 ne’ebé moris iha kondisaun vulnerável tebes, tanba ne’e husu Prezidente Repúblika (PR), José Ramos Horta no Ministériu Solidariedade Sosiál no Inkluzaun (MSSI) no entidade relevante sira atu tau matan no fó tulun ba família sira ne’e.
Nia hatete katak, identifikasaun ne’e halo durante atividade vizita no observasaun direta iha aldeia sira, hodi haree kondisaun moris komunidade no família sira ne’ebé presiza atensaun.
Xefe Suku hatete, família sira ne’e hasoru difikuldade oi-oin, inklui hela iha uma la dignu, difikuldade atu hetan hahan no asesu ba estrada.
“Durante ami nia vizita, ami hetan komunidade uma-kain 16 ne’ebé moris vulnerável liu. Inan-aman sira hela iha uma ne’ebé la dignu, hahan mos susar, no atu asesu ba estrada mos difísil. Tanba ne’e, ami nu’udar autoridade lokál husu ba Prezidente Repúblika, Ministériu Solidariedade Sosiál no entidade relevante sira atu bele tulun ami nia populasaun sira ne’e,” dehan Xefe Suku.
Nia hatete, depois halo levantamentu no vizita hotu, autoridade suku sei prepara relatóriu atu hato’o ba Postu Administrativu no Munisípiu, hodi autoridade kompetente sira bele haree no buka solusaun ba problema komunidade nian.
(eme)
