DILI, STLTIMORLESTE.com – Prezidente Republika (PR), Jose Ramos Horta hatete, Timor Leste ho Emiradus Árabes Unidus (EAU) dadaun ne’e iha relasaun ne’ebé metin.
Prezidente Republika Jose Ramos Horta hatoo kestaun ne’e ba Jornalista iha Palasiu Prezidensial Nicolau Lobato? Bairo Pite, Kuarta (02/09/2026) hatete, dadaun ne’e relasaun rai rua metin, no Unidus (EAU) sei loke nia embaixada iha Timor Leste, alende ne’e sei apoiu halo dormitoriu ba foinsáe feto sira iha Palasiu oin nomos seluk tan.
“Relasaun ho sira agora metin los visi Ministru Negósiu Estranjeiru foin mai hahu oinsá atu aumenta koperasaun teknika,” katak Prezidente Republika.
Alende ne’e iha Jantar Resepsaun iha Selebrasaun Amizade entre Timor-Leste no Emiradus Árabes Unidus (EAU) Prezidente hatete iha lideransa husi Sua Alteza Sheikh Mohamed bin Zayed Al Nahyan, Emiradu Árabe Unidu kontinua hatudu oinsá vizaun, abertura no investimentu iha ema sira bele transforma Nasaun ida. Timor-Leste admira tebes realizasaun no lideransa husi Emiradus Árabes Unidus.
“Ita-nia relasaun nia fundamentu sira harii ona antes estabelesimentu relasaun diplomátika formál sira, iha loron 13 fulan-novembru tinan 2009. Ha’u hanoin, liuliu, Timor-Leste nia apoiu, iha 2009, ba Emiradus Árabes Unidus nia tentativa atu sai uma-na’in ba sede Ajénsia Internasionál ba Enerjia Renovável IRENA iha Abu Dhabi. Hahú husi ne’ebá, ita-nia relasaun kontinua dezenvolve-an bazeia ba respeitu ba malu, solidariedade no amizade. Ohin loron, amizade ne’ebá transforma-an ba parseria konkreta ida ba dezenvolvimentu,” dehan PR Horta.
Ida hosi ninia espresaun sira ne’ebé signifikativu liu maka Komplexu Rezidensiál ba Estudante Universitária sira, ne’ebé agora daudaun iha hela konstrusaun iha Díli, ho apoiu jenerozu hosi Sua Alteza Sheikh Mohamed bin Zayed Al Nahyan.
Rezidénsia ne’e sei fornese akomodasaun seguru ba estudante universitária feto to’o 300 mai hosi família vulneravel sira iha país tomak, hodi ajuda feto foin-sa’e sira ultrapasa barreira boot ida hodi kontinua ensinu superiór iha Díli.
Ida-ne’e liu fali infraestrutura de’it. Ida-ne’e investimentu ida iha Timor-Leste nia oan-feto sira, iha edukasaun, iha feto sira no iha Nasaun nia futuru.
“Ami mós valoriza oportunidade atu reforsa formasaun ba diplomata no funsionáriu públiku sira husi Timor-Leste liuhosi Akademia Diplomátika Anwar Gargash, iha Abu Dhabi. Ida-ne’e sei sai investimentu ida iha ami-nia kapitál umanu no kapasidade institusionál ami-nia Estadu nian, enkuantu iha tempu hanesan kria lasu sira ne’ebé dura ba tempu naruk entre ita-nia país rua,” dehan Horta.
Lori povu Timor-Leste nia naran, agradesimentu kle’an ba Sua Alteza Sheikh Mohamed bin Zayed Al Nahyan ba jestu amizade no laran-luak ne’ebé estraordináriu sira-ne’e. Parseria ida ne’ebé Luan Liu ba dezenvolvimentu.
(eme)
