DILI, STLTIMORLESTE.com – Jardim Motael ne’ebe naroman iha tempu kalan, sai hanesan sentru atividade ba komunidade hodi paseiu no halao negosiu kiik.
Tuir observasaun jornalista STL iha terrenu, Kuarta (02/09/2026) tuku 08:00 kalan, nota katak area Jardim Motael naroman ho lampu, komunidade balun lao ba-mai iha dalan, balun tuur iha jardin laran.
Iha fatin refere, vendedor sira okupa dalan ninin hodi faan nuu, hahan tradisional no bebida sira, motor balun para iha estrada ibun.
Komunidade ne’ebe mai paseiu, maioria mak foinsa’e no familia sira ne’ebe hakarak buka anin foun iha tasi ibun, balun lori oan kiik hodi halimar iha jardin laran.
Transporte no movimentu iha area ne’e mos hahú rame, motor no kareta balun para hodi tun no sae pasajeiru ne’ebe mai husi fatin seluk.
Maski nune’e, ambiente iha Jardim Motael iha kalan kontinua seguru no furak, sai hanesan fatin ida ne’ebe komunidade bele halibur malu hodi hasae ekonomia familia.
Tuir negosiante nuu, Domingas da Silva hatete, nia faan nuu iha Jardim Motael tinan rua ona, kalan ema barak mak mai sosa.
“Ami faan nuu iha ne’e husi tuku 6 lokraik to’o tuku 11 kalan, kalan ema barak mai paseiu, ami bele faan to’o 50 ka 60, hetan US$25 too US$30,” dehan Domingas ba STL iha fatin refere.
Domingas hatutan, folin nuu US$1 too US$1.25 depende boot kiik, rendimentu ne’e nia uza hodi sustenta familia no selu oan sira nia eskola.
“Ami agradese tanba jardin agora naroman ona, maibe ami husu ba Governu atu tau atensaun ba lixu no bee moos iha fatin faan nian,” tenik nia.
Iha sorin seluk, komunidade ne’ebe mai paseiu, Mariana da Silva hatete, nia sempre mai Jardim Motael hamutuk ho familia iha tempu kalan.
“Ami mai iha ne’e tanba fatin ne’e furak no anin foun, ami bele tuur hamutuk hemu nuu no han sate, labarik sira mos bele halimar,” dehan Mariana.
Mariana husu ba autoridade atu tau atensaun ba ijiene no aumenta kadeira iha jardin laran, nune’e komunidade ne’ebe mai paseiu bele sente konfortavel liu tan.
(car)
