DILI, STLTIMORLESTE.com – Rede Scamming Call Centre buras iha Dili estraga imajen Timor-Leste (TL) iha mundu internasional, tanba Polísia Nasionál Timor-Leste (PNTL) liu husi DSIK hamutuk ho DSIP, desmantela rede scam Call Center ida iha Kolmera no detein sidadaun Xina na’in-neen.
Akademista UNTL, Silveiro de Araujo hatete, rede scam ne’ebe buras iha Dili estraga tebes imajen TL iha internasional no presiza atensaun seriu husi estadu.
“PNTL halo ona servisu ne’ebe merese apresia, tanba bele desmantela rede scam call center iha Kolmera. Maibe kestaun boot liu mak, oinsa rede estranjeiru sira ne’e bele instala an fasil iha kapitál Dili. Ida ne’e ameasa ba seguransa nasional no estraga imajen TL,” dehan Silveiro ba STL, Kinta nee (03/09/2026).
Nia hatutan, atividade scam call center laos krime baibain, maibe krime organizadu ne’ebe bele iha ligasaun ho rede money laundering no trafiku umanu.
“Governu no PNTL tenke haree kle’an, se mak fasilita viza, se mak aluga edifisiu, no tanba sa sistema detesaun tarde. Ita presiza hametin Servisu Migrasaun, Servisu Intelijensia no kria lei cybercrime ne’ebe forte,” nia tenik.
Iha fatin ketak, Observador Politika, Antonio Magno hatete, fenomena scam call center hatudu frakeza kontrolu fronteira, no fasilidade viza nian ne’ebe fo impaktu ba seguransa.
“Estadu tenke halo auditoria ba ema estranjeiru sira ne’ebe tama mai Timor-Leste, uza viza turizmu maibe hala’o atividade ilegal. Se la kontrola didiak, ita-nia nasaun sai vulneravel ba krime transnasional,” dehan Antonio Magno.
Entretantu antes nee iha loron Kuarta,(02/09/2026) Polísia Nasionál Timor-Leste (PNTL), liu husi Diresaun Servisu Investigasaun Kriminál (DSIK) hamutuk ho Diresaun Servisu Informasaun Polísia (DSIP), halo operasaun no konsege desmantela tan atividade rede scam call center ida iha área Kolmera, Díli, no detein sidadaun estranjeiru husi Xina na’in-neen, ne’ebé suspeitu hala’o atividade ilísita liuhusi scam call centre.
Operasaun ne’e akontese iha kuaze tuku 19:00 kalan, bainhira autoridade seguransa tama ba rezidénsia ida iha Kolmera no detein sidadaun estranjeiru husi Xina na’in-neen, ne’ebé suspeitu envolve iha atividade ilísitu scam call centre. Hafoin buska no apreensaun remata, autoridade seguransa lori kedas sidadaun estranjeiru Xina na’in-neen, hamutuk ho evidénsia sira ne’ebé hala’o apreensaun ba edifísiu DSIK, Komandu Jerál PNTL, iha Kaikoli, Díli, atu kontinua prosesu investigasaun.
Operasaun ne’e halo nu’udar parte husi esforsu autoridade seguransa atu prevene, deteta no investiga atividade ilísita ne’ebé suspeitu hala’o iha territóriu Timor-Leste.
(car)
