DILI, STLTIMORLESTE.com – FRETILIN Munisipiu Manufahi halao kontaktu eleitoral no konsolidasaun ho militante, simpatizante no povu jeral liu husi Konferensia Postu Administrativu 4, hodi prepara an hasoru eleisaun sira iha tinan oin mai.
Vise Koordenador FRETILIN Munisipiu Manufahi, atual Deputadu Bankada FRETILIN, Antoninho Doutel Sarmento hatete, atividade konsolidasaun ne’e inklui Konferensia Postu Administrativu sira hanesan Alas, Fatuberlio, Same no Turiscai hodi hili estrutura Komisaun Politika Postu no estrutura Sekretariu Ezekutivu Juventude FRETILIN Postu no Munisipiu nian.
“FRETILIN uluk kedas preparado no organizadu hahu husi proklamasaun 28 Novembru 1975, ohin mos FRETILIN nafatin preparadu hodi hasoru kualker eleisaun sira ne’ebe destinadu ba tinan sira mai oin. Ne’e mak kontaktu eleitoral no konsolidasaun sira ne’ebe ami halo,” dehan Antoninho ba STL, iha Dili, Kinta nee (03/09/2026).
Nia hatutan, programa politika FRETILIN nian hodi ajuda no konsolida komunidade mak defende no konsolida independensia nasional, ba justisa sosial no harii estadu direitu demokratika Timor-Leste nian.
“Ho nia objetivu prinsipal sira mak Soberania, justisa sosial no demokrasia, ho nia dalan ba atuasaun sira mak ekonomia sosial no aliansa politika. FRETILIN sempre garante hodi kontribui ho estabilidade politika, nudar opozisaun ne’ebe konstrutivu,” nia tenik.
Kona ba dezafiu demokrasia nian, Antoninho ezije FRETILIN nia ema sira, atu iha konsolidasaun no konsiensializa povu ba dalan loos mak FRETILIN hakarak “Libertasaun do Povu Maubere” nian.
“Relasaun lao diak hela, tanba FRETILIN ninia kapasidade iha demokrasia konsidera partidu sira seluk hanesan adversariu politika, laos inimigu politika. Ho autoridade lokal no munisipiu diak, tanba FRETILIN ninia reprezentante hola parte mos iha Konsellu Konsultivu Munisipiu nian hodi bele kontribui ideia ideal sira ne’ebe presiza ba transformasaun koletivu rai Manufahi nian,” nia dehan.
Nia mos husu militante, simpatizante no povu atu hametin konfiansa ba FRETILIN hodi kontinua luta ba libertasaun povu Maubere.
“Militante, simpatizante no povu Maubere hamriik metin nafatin iha valores FRETILIN nian, Hamutuk Ita Bele,” nia hakotu.
Iha parte ketak, Observador Politika, Santiago Martins hatete, konsolidasaun ne’ebe FRETILIN Manufahi halo hanesan pasu pozitivu hodi hametin baze.
“Konsolidasaun iha nivel postu importante tebes, tanba FRETILIN presiza estrutura ne’ebe forte to’o baze hodi hasoru eleisaun oin mai. Ida ne’e hatudu FRETILIN nafatin iha komitmentu ba demokrasia,” dehan Santiago.
Entretantu Akademista UNTL, Jaime da Silva Guterres hatete, FRETILIN nia istoria organizasaun dezde 1975 sai kapital politika ne’ebe presiza adapta ho realidade foun.
“FRETILIN iha baze istoria no ideolojia ne’ebe klaru, maibe dezafiu agora mak oinsa konsolida juventude no lori programa ekonomia sosial ne’ebe responde ba nesesidade povu nian, liu-liu iha Manufahi,” dehan Jaime.
(car)
