DILI, STLTIMORLESTE.com — Tribunal Judisial Primeira Instánsia Suai (TJPIS) iha loron Kinta (03/09/2026) liu husi desizaun ikus ba prosesu primeiru interrogatóriu, deside aplika medida koasaun Prizaun Preventiva ba arguidu nain ha’at (4), ne’ebé deskonfia envolve iha kazu halakon vida vítima, Terezinha Cardozo.
Arguidu nain ha’at ho inisiál SNI, DC, JC no AMA, hetan akuzasaun husi Ministériu Públiku liu husi Prokuradór Renato Bere Nahac, ho krime Omisídiu Simples, ne’ebé previstu iha Artigu 138 hosi Kódigu Penal Timor-Leste.
Artigu refere determina katak ema ne’ebé oho ema seluk bele hetan pena prizaun entre tinan 8 to’o tinan 20.
Iha desizaun Tribunal nian, haree katak iha indísiu sira ne’ebé liga arguidu sira ho krime ne’ebé Ministériu Públiku promove ba Tribunal. Tanba ne’e, Tribunal deside aplika medida Prizaun Preventiva ba arguidu nain ha’at, ho objetivu atu asegura prosesu investigasaun ne’ebé sei lao hela.
“Tribunal aplika medida Prizaun Preventiva ba sira nain ha’at hotu, no promove sira ho krime Omisídiu Simples,” dehan fonte judisiál ida ba STL liu husi telefone, Kinta (03/09/2026).
Antes desizaun ne’e, Prokuradór Renato Bere Nahac husu Tribunal atu aplika medida Prizaun Preventiva ba arguidu nain ha’at.
Enkuantu ne’e, parte defeza hosi arguidu sira husu Tribunal atu aplika medida Termu Identidade no Rezidénsia (TIR) ba arguidu nain ha’at, hodi asegura sira nia prezensa durante prosesu investigasaun ne’ebé sei lao hela.
Tuir prosedimentu legál ne’ebé aplika, se arguidu sira la konkorda ho desizaun Tribunal nian, sira bele liu husi defeza halo rekursu ba Tribunal Rekursu (TR) tuir prazu legál ne’ebé determina.
Rekorda katak, kazu ne’e akontese iha Aldeia Wetaba, Postu Administrativu Tilomar, Munisípiu Covalima.
(ter)
