BAUCAU, STLTIMORLESTE.com – Deskonfia sirkuitu husi fiu eletrisidade sai kauza ba insendiu ne’ebé rezulta uma rua mutuk totál iha Munisípiu Baucau.
Komandante Operasaun APC Baucau, Francisco Viana Freitas, hateten katak husi insendiu rua refere ida rejistu iha Suku Caibada Macasa’e Postu Administrativu Baucau Vila akontese iha loron 02 Setembru 2026, parte madrugada, no ida Suku Uma Ana Ico, Postu Administrativu Venilale.
“Insendiu ida akontese iha Caibada Macasa’e ne’e madrugada iha komunidade sira mai informa ami nia ekipa Bombeirus aranka kedas ba fatin iha oras 00:00 kalan,” hateten Francisco ba STL iha nia knaar fatin Tirilolo Baucau Vila, Kinta (03/09/2026)
Nia hateten, bainhira ekipa Bombeirus to’o iha fatin, sira la’ós de’it salva uma ne’ebé hetan insendiu, maibé mós esforsu atu proteje uma vizinhu sira husi risku ahi.
Insendiu ne’e rezulta uma ida mutuk totál, inklui sasan no dokumentu importante balu ne’ebé iha uma laran.
Francisco hateten katak uma ne’e pertense ba família Sofia Freitas, ne’ebé hela ho membru família na’in haat, kompostu husi feto na’in tolu no mane ida.
“Uma ne’e mutuk totál, inklui sasan no dokumentu balu. Família ne’e ema na’in haat, feto tolu no mane ida. Sira nia uma provizóriu, no ami deskonfia kauza insendiu mai husi sirkuitu fiu eletrisidade. Insendiu ne’e la rezulta ema kanek ka mate,” nia hateten
Depois halo verifikasaun iha fatin, ekipa Bombeirus mós fó apoiu emerjénsia ba vítima sira no ajuda evakua família ne’ebé afetadu ba hela temporáriu iha uma família vizinhu.
Além de insendiu iha Caibada Makasa’e, Francisco mós relata katak iha Suku Uma Ana Ico, Postu Administrativu Venilale, akontese insendiu iha loron 28 Agostu 2026.
Insendiu iha Venilale ne’e mós rezulta uma ida mutuk, ho família na’in hitu ne’ebé hela iha uma refere, provizoriu atual hela iha viziñu sira.
“Iha Venilale akontese iha loron 28 Agostu, iha Suku Uma Ana Ico. Família ida ne’e ema na’in hitu. Uma mutuk no kauza ne’e mós deskonfia mai husi fiu eletrisidade. La rezulta ema kanek no mate,” Francisco esplika
Maski nune’e, vítima insendiu iha Venilale seidauk simu apoiu emerjénsia, tanba limitasaun transporte ne’ebé enfrenta husi ekipa APC Munisípiu Baucau.
Francisco hateten katak ekipa sei kontinua halo distribuisaun apoiu ba vítima sira tuir prioridade no kapasidade transporte ne’ebé iha.
“Iha Venilale ne’e seidauk simu apoiu emerjénsia. Tanba ohin ami iha Baucau Vila fó apoiu iha suku tolu. Aban sei ba Quelicai, no posibilidade segunda-feira semana oin mak ami fó apoiu ba iha ne’ebá,” nia hateten
Nia mós hateten katak difikuldade boot ida mak APC Baucau atualmente iha transporte ida de’it ne’ebé uza atu halo sirkulasaun ba área sira ne’ebé presiza apoiu.
“Ami iha transporte ida de’it atu halo sirkulasaun, no difikuldade mak iha ne’e,” nia afirma.
(tom)
