DILI, STLTIMORLESTE.com — Malnutrisaun presiza haree hanesan problema ekonomiku, tanba afeta produtividade, kapital umanu no dezenvolvimentu Timor-Leste iha futuru.
Deklarasaun ne’e haktuir husi oradór prinsipál, Dr. Rui Araújo, iha Kolókiu Nasionál ho tema “Importánsia Nutrisaun ba Dezenvolvimentu Feto no Labarik iha Timor-Leste”, ne’ebé organiza husi Fundasaun Alola, iha Salaun Igreja Nossa Senhora Imaculada da Conceição, Balide, Dili, Kinta (03/09/2026).
Rui Araújo hatete, Timor-Leste hetan ona soberania polítika, maibé seidauk hetan soberania ekonomika tanba sei depende maka’as ba produtu importasaun.
Nia afirma katak, problema malnutrisaun la’ós problema sosial de’it, maibé mos problema ekonomiku ne’ebé presiza envolve setor no instituisaun hotu.
“Presiza muda mindset katak problema malnutrisaun la’ós problema sosial de’it, maibé problema ekonomiku,” dehan Rui.
Tuir Rui, investimentu ba nutrisaun importante tebes tanba malnutrisaun bele afeta kresimentu no produtividade ema nian iha futuru. Tanba ne’e, kapital umanu tenke sai prioridade iha estratéjia dezenvolvimentu nasional.
Nia hatete katak, maski iha esforsu no investimentu durante tinan 10 liubá, rezultadu iha redusaun malnutrisaun seidauk signifikativu, ho redusaun númeru malnutrisaun besik 1% de’it.
Rui subliña katak kresimentu ekonomiku iha futuru la bele depende de’it ba rekursu naturais hanesan mina, maibé tenke depende ba kapasidade no qualidade kapital umanu.
Nia mos apela ba organizasaun sosiedade sivíl atu ajuda muda mindset komunidade kona-ba nutrisaun, liuliu iha família, aldeia no nível munisípiu.
Segundo Rui, motivasaun no konsiénsia família kona-ba importánsia hahan nutritivu ba labarik sira sei sai fator importante atu prevene malnutrisaun.
Nia konsidera katak servisu Ministériu Saúde no apoiu husi organizasaun naun-governamentál (ONG) sira diak ona, maibé esforsu hotu tenke akompaña ho mudansa hanoin iha komunidade.
Rui mos afirma katak, independénsia polítika bele hetan, maibé soberania ekonomika presiza apoiu husi ema nia hanoin, ideia no kapasidade atu kontribui ba dezenvolvimentu.
(eme)
