DILI, STLTIMORLESTE.com – Ministeriu Edukasaun (ME) sei hahu impresaun pontus ba Ezame Nasional iha loron 7 fulan Setembru 2026, no prosesu impresaun ne’e sei remata iha loron 16 fulan Outubru tinan 2026.
Koordenador Gabinete Unidade Kurrikulu Nasional iha ME, João Mau Pelu hato’o informasaun ne’e ba STL iha nia knar fatin, Kinta (03/09/2026).
“Hau hanoin, 7 Setembru agora hahu ona impresaun pontus Ezame Nasional iha sentru impresaun. Ami sei halo impresaun pontus ezame nee to’o loron 16 fulan Outubru mak foin remata. Dadus finalista sira husi eskola sira iha munisípiu sira agora tama hela iha faze verifikasaun,” nia dehan.
João Mau Pelu esplika katak, dadus finalista sira sei verifika uluk atu bele determina ho loos númeru finalista ne’ebé sei partisipa iha Ezame Nasional tinan ida-ne’e.
“Bainhira remata ona prosesu verifikasaun, mak foin ita bele hatene lolos númeru finalista sira ne’ebé sei partisipa iha Ezame Nasional, ne’ebé tuir planu sei hala’o iha loron 19 fulan Outubru tinan ida-ne’e,” nia hatutan.
Nia dehan, preparasaun ba Ezame Nasional tinan 2026 lao hela, tanba ME simu ona lista finalista husi eskola sira iha munisípiu ida-idak.
“Ita-nia preparasaun ba Ezame Nasional iha tinan nee lao dadaun ona. Ita simu lista finalista husi eskola sira iha munisípiu ida-idak, no agora dadus sira tama iha faze verifikasaun, atu bele hatene ho loos dadus finalista sira,” dehan João Mau Pelu.
(jac)
