DILI, STLTIMORLESTE.com — Fundasaun Alola halo advokasia ba labarik liu 15.000 iha suku tarjetu malnutrisaun liuhusi programa saúde inan no oan.
Diretora Ezekutiva Fundasaun Alola, Maria Guterres, hatete advokasia ne’e foka ba labarik ho idade zero to’o tinan 2, liuliu iha suku sira ne’ebé sai tarjetu ba programa kombate malnutrisaun.
“Ami kobre ona labarik liu 15.000 ne’ebé iha área suku balun, ne’ebé ami implementa programa ba tinan kotuk to’o mai tinan ida ne’e. Ami kontinua servisu ho parte relevante sira, liuliu Governu, setor privadu no esforsu ami rasik,” dehan Maria Guterres ba jornalista iha Balide, Kinta (3/9/2026).
Nia hatete, Fundasaun Alola agora kobre liu 100 suku, maibé seidauk kobre munisípiu tomak. Iha Manufahi, programa ne’e hala’o iha 10 suku, enkuantu iha Aileu kobre 7 suku.
Maria esplika katak Alola antes kobre suku 20 iha Aileu, maibé agora redireciona atividade ba suku sira ne’ebé seidauk hetan informasaun kona-ba nutrisaun.
“Bainhira komunidade iha ona matenek no koñesimentu, ita lakohi atu buat ne’ebé sira bele ona ita halo nafatin ba sira. Ita husik sira hamriik mesak no la dependente. Entaun ami fila fali ba suku sira ne’ebé seidauk hetan informasaun,” nia hatete.
Alola implementa atividade nutrisaun iha munisípiu Manufahi, Ermera, Aileu, Ainaro, Likisá, Vikeke no Baucau. Antes, programa ne’e kobre munisípiu 11, ho área servisu muda tuir apoiu husi doadór sira.
Maria subliña katak kombate malnutrisaun presiza kolaborasaun entre Governu, sosiedade sivil, parseiru dezenvolvimentu no família.
“Ami hakarak kontribui atu hadia nutrisaun ba labarik sira barak liután iha Rai-Doben. Ami fiar katak la’ós Alola mesak bele halo mudansa, maibé ho parseiru sira, sosiedade sivil no Governu, ita bele halo mudansa,” dehan nia.
Ba atividade nutrisaun iha tinan ida ne’e, Fundasaun Alola hetan apoiu US$50.000. Osan ne’e destina ba atividade foka ba feto no labarik, inklui igualdade jeneru ne’ebé liga ho nutrisaun, ho apoiu liuhusi Rede Sosiedade Sivil ba Nutrisaun Cassantil.
Nia hatete programa saúde inan no oan agora hala’o iha nivel nasional, inklui Munisípiu Manufahi. Ho apoiu GASS, Alola iha planu atu habelar atividade ba munisípiu sira seluk iha tinan oin.
Rede Sosiedade Sivil ba Nutrisaun agora iha organizasaun 26 ne’ebé sai membru.
Enkuantu ne’e, estudante Fakuldade Medisina, Departamentu Farmásia UNTL, Acásio Doutel, hatete kombate malnutrisaun la’ós responsabilidade parte ida deit, maibé presiza servisu integradu husi Governu, parseiru, sosiedade sivil no família.
“Importante liu mai husi família, liuliu inan sira, atu haree didiak ai-han ne’ebé iha nutrisaun no fó ba oan sira,” dehan Acásio.
Nia hatutan, situasaun ekonomia família balun mos sai obstákulu ba asesu ba ai-han nutritivu, tanba família sira balun iha rendimentu limitadu.
Infermeira Noi da Costa hatete ai-han lokal sira bele sai fonte nutrisaun importante ba família. Profisionál saúde, tuir nia, kontinua fó edukasaun ba komunidade no pasiente sira durante konsulta kona-ba ai-han nutritivu.
“Liuliu inan isin-rua no inan ne’ebé fó susu, tenke konsumu ai-han lokal, tanba maioria produtu ita nian sei lokal. Ami sempre fó avisu no advokasia ba sira bainhira mai konsulta,” dehan nia.
(dom)
