DÍLI, STLTIMORLESTE.com – Atleta paralímpiku Timor-Leste, Teófilo Freitas, konkista medalha prata iha prova corrida 1.500 metru, iha Asian Para Games Aichi-Nagoya 2026, Japaun.
Teófilo Freitas konkista medalha prata depois remata prova 1.500 metru ho tempu minutu 4 no segundu 25,39, iha pozisaun daruak, sexta-feira (23/10/2026).
Rezultadu ne’e sai kontributu importante ba desportu paralímpiku Timor-Leste, tanba Teófilo konsege konkore ho atleta sira husi nasaun seluk iha kompetisaun nivel Ázia.
Aleinde medalha prata iha prova 1.500 metru, Teófilo mós partisipa iha prova korrida 400 metru, ho tempu segundu 54,71, no remata iha pozisaun kalima.
Atleta Timor-Leste seluk, Joãozinho Fernandes Araújo no Romeiro de Deus, mós reprezenta nasaun iha modalidade para atletismo, liuhusi prova korrida 400 no 1.500 metru.
Joãozinho Fernandes Araújo remata prova 400 metru ho tempu minutu 1 no segundu 7,87, enkuantu iha prova 1.500 metru rejista tempu minutu 5 no segundu 22,21.
Entretantu, Romeiro de Deus partisipa iha prova corrida 1.500 metru no remata ho tempu minutu 5 no segundu 25,86.
Asian Para Games Aichi-Nagoya 2026 hala’o durante loron hitu, husi 18 to’o 24 Outubru 2026, iha Japaun, ho partisipasaun atleta paralímpiku husi nasaun sira iha Ázia.
Partisipasaun atleta timoroan na’in tolu ne’e hatudu esforsu Timor-Leste atu dezenvolve desportu paralímpiku no fó oportunidade ba atleta ho defisiénsia atu demonstra sira-nia kapasidade iha kompetisaun internasionál.
(leo)
