DILI, STLTIMORLESTE.com — Prezidente Repúblika (PR), José Ramos-Horta loke ofisialmente Kongresu Asosiasaun Asilu Polítiku Timor-oan ba Independénsia (APPT), iha Dili, Sesta-feira (23/10/2026).
Iha ninia diskursu, Xefe Estadu hato’o apresiasaun ba korajen no estratéjia jovem klandestinu Timor-oan sira ne’ebé buka asilu polítiku iha embaixada estranjeira sira iha Jakarta, durante luta ba independénsia.
Ramos-Horta fó hanoin fila fali kona-ba protestu estudante Timor-oan sira nian iha 1994, durante enkontru APEC, ne’ebé envolve tama ba Embaixada Estadus Unidus Amérika (EUA).
Nia konsidera asaun ne’e hanesan estratéjia importante atu lori luta Timor-Leste nian ba atensaun média internasionál no hametin presaun diplomátika hasoru okupasaun.
Prezidente mós esplika ninia esforsu iha Washington, D.C., atu prepara materiál informativu ba jornalista internasionál sira kona-ba situasaun okupasaun embaixada.
Nia destaka kontribuisaun jornalista internasionál, inklui Amy Goodman no Max Stahl, ne’ebé ajuda habelar informasaun kona-ba luta Timor-Leste nian ba públiku mundiál.
Ramos-Horta mós refere mudansa pozisaun administrasaun Prezidente EUA Bill Clinton kona-ba Timor-Leste, inklui apoiu ba diálogu kona-ba direitu autodeterminasaun iha períodu APEC 1994.
Iha parte seluk, Xefe Estadu subliña katak independénsia Timor-Leste nian hetan liuhusi sakrifísiu koletivu husi movimentu rezisténsia no apoiu komunidade sira.
Nia fó omenajen ba FALINTIL, rede klandestina, família sira ne’ebé lakon membru, no Kreda Katólika, inklui Bispu Carlos Filipe Ximenes Belo no Dom Martinho da Costa Lopes.
Iha remata diskursu, Ramos-Horta reafirma apresiasaun Estadu nian ba ema hotu ne’ebé sakrifika juventude, seguransa no moris atu realiza soberania Timor-Leste.
(eme)
