DÍLI, STLTIMORLESTE.com – Limitasaun profesores kontinua sai dezafiu ba eskola ensinu baziku sentrál (EBC), ensinu baziku filial no ensinu sekundáriu iha Munisípiu Manatuto, ne’ebé eskola balun hasoru falta profesores tanba kondisaun saúde no idade reforma.
Diretór Servisu Edukasaun Munisípiu Manatuto, Luis Antonio Soares, haktuir ba STL liuhusi telefone, Sesta (23/10/2026), katak falta professores sai problema ida ne’ebé kontinua hasoru eskola sira iha munisípiu ne’e.
“Iha ne’e dezafiu barak. Husi inísiu kedas, limitasaun professores sai problema ida ba ami, tanba eskola balun menus tebes professores,” nia haktuir.
Nia esplika katak, eskola hotu iha Munisípiu Manatuto, inklui ensinu baziku sentrál, filial no ensinu sekundáriu, presiza professores tanba to’o agora sei hasoru limitasaun iha rekursu umanu.
Enkuantu ne’e, Diretór Servisu Edukasaun Munisípiu Liquiça, Julio da Silva, hatete katak professores balun iha eskola sira iha munisípiu ne’e hasoru problema saúde no la konsege hanorin estudantes. Tanba ne’e, nia konsidera katak presiza aumenta númeru professores, liuliu atu substitui sira ne’ebé moras no sira ne’ebé besik tama idade reforma.
“Ita-nia profesores iha eskola sira Munisípiu Liquiça balun moras no la hanorin estudantes iha eskola. Tanba ne’e, ba oin presiza aumenta professores, liuliu iha eskola sira ne’ebé ninia professores moras no balun atu tama idade reforma,” nia esplika.
Iha parte seluk, Diretór Eskola Sekundária Jerál N.º 4 de Setembru, Balide, Sergio A. da Cruz, hatete katak eskola ne’e iha professores na’in lima ne’ebé tama ona idade reforma obrigatória iha tinan 2026.
Maski nune’e, nia dehan katak to’o agora númeru professores iha eskola ne’e sei sufisiente. Maibé, karik professores na’in lima ne’e reforma, eskola sei presiza substitutu atu kontinua asegura prosesu aprendizajen ba estudantes.
(jac)
