DILI, STLTIMORLESTE.com – Komunidade afetadu husi alargamentu Aeroportu Internasional Nicolau Lobato husu ba IX Governu, ne’ebé lidera husi Primeiru-Ministru Xanana Gusmão, atu halo lalais pagamentu indemnizasaun ba rai, aihoris no uma sira ne’ebé, tuir sira nia deklarasaun, governu sobu no estraga ona, maibé to’o agora seidauk hetan indemnizasaun.
Agosto Pereira, ida husi komunidade afetadu hateten ba jornalista STL iha nia hela-fatin, Aldeia Anin Fuik, Suco Madohi, Sesta feira, 4 Setembru 2026, katak nia no komunidade seluk enfrenta ona difikuldade moris tanba fonte rendimentu sira ne’ebé antes uza hodi sustenta família, inklui hodi selu eskola oan sira no sosa hahán, agora lakon ona.
“Ha’u husu ba Primeiru-Ministru Xanana Gusmão atu halo pagamentu ba ha’u nia rai, aihoris no uma ne’ebé IX Governu sobu no estraga ona. Ami agora terus loos ona. Ha’u husu atu ukun para halo ami povu moris diak, la’ós halo ami povu terus liu tan,” hateten Agosto.
Nia esplika katak, antes alargamentu aeroportu, komunidade sira uza rai hodi halo to’os no kuda modo, ne’ebé sai fonte rendimentu importante ba família sira.
“Fatin ne’ebé ami halo kantadeiru hodi kuda modo, agora IX Governu ne’ebé lidera husi Xanana Gusmão mai sobu no estraga hotu kedas. Uluk ami iha osan hodi selu labarik sira nia eskola, sosa hahán no nesesidade loron-loron, maibé depois de ezekusaun ne’e, ami moris terus liu,” nia hateten.
Agosto mos afirma katak komunidade balun iha dokumentus ne’ebé, tuir sira, hatudu sira nia direitu ba rai ne’ebé sira hela no uza. Nia dehan katak durante tempu Indonézia, sira mos selu taxa rai ou Pajak Tanah ba autoridade iha tempu ne’ebá.
“Ami iha dokumentus ne’ebé hatudu katak ami mak nain ba rai ne’ebé governu mai dudu. Iha tempu Indonézia, ami sempre selu taxa rai ba governu Indonézia. Maibé governu agora dehan ami laiha direitu ba rai ida-ne’e,” nia afirma.
Nia konsidera situasaun ne’e la justu, tanba tuir nia, iha komunidade balun ne’ebé laiha dokumentus rai maibé hetan ona indemnizasaun, enquanto komunidade sira ne’ebé iha dokumentus rai seidauk hetan pagamentu.
“Afetadu balun laiha dokumentus ba rai, maibé governu halo indemnizasaun. Ami ne’ebé iha dokumentus konaba rai, governu konsidera rai estadu. Se governu dehan rai ne’e rai estadu, governu tenki hatudu evidénsia ka dokumentus ne’ebé hatudu katak rai ne’e duni rai estadu, para ami bele hatene baze legal husi desizaun ne’e,” Agosto dehan.
Komunidade afetadu balun sente katak prosesu indemnizasaun ne’e bele hamosu tratamentu la hanesan entre komunidade sira. Sira husu ba governu atu fó klarifikasaun kona-ba estatutu rai sira ne’ebé afetadu husi alargamentu Aeroportu Internasional Nicolau Lobato, no atu garante prosesu indemnizasaun ne’ebé transparente no justu ba komunidade hotu ne’ebé afetadu.
(leo)
