BAUCAU, STLTIMORLESTE.com – Labarik Maria Menezes Alves, tinan 2, hetan tata husi asu iha Suku Alaua Craik, Postu Administrativu Baguia, Munisípiu Baucau, rezulta nakles no hetan suku pontu 7 iha Sentru Saúde Baguia.
Xefe Suku Alaua Leten, João Baptista Alves informa, insidente ne’e akontese iha loron 4 Setembru 2026, tuku 10:00 dadeer no asu ne’ebé tata labarik ne’e pertense ba família rasik.
“Asu tata duni labarik feto ida. Asu ne’e la’ós ema seluk nian, asu ne’e ninian duni. Tuir foto ne’ebé sira haruka mai, asu tata iha nia kakorok, rentos no hasan, rezulta nakles,” hateten João Baptista ba jornalista sira iha Vila Antiga Baucau, Sesta (04/09/2026)
Nia esplika, depois akontese insidente, vítima refere parte família lori kedas ba Sentru Saúde Baguia hodi hetan tratamentu emerjensia, tanba fatin kanek ne’ebé hetan tata husi asu iha rentos nakles rezulta suku pontu tolu, hasan suku pontu haat.
Mezmu kondisaun kanek nune’e, maibé João informa parte pesoal saúde sira iha Sentru Saúde Baguia konsidera diak fó alta ona vítima fila ba uma.
“Ohin ami kontaktu ona na’in asu atu kaer. Ami fó ona informasaun ba Munisípiu oinsá mak bele enkamiña ba Veterinária, atu sira sa’e ba hasai amostra asu nian,” nia hateten.
João Baptista mós hateten katak, maski Postu Administrativu Baguia rejista ona kazu tata asu, maibé ba kazu ne’e foin primeiru ne’ebé akontese espesialmente iha Suku Alaua Craik.
(tom)
