DILI, STLTIMORLESTE.com – Prezidente Repúblika (PR), Jose Ramos-Horta subliña potensiál Timor-Leste (TL) atu sai ponte estratéjika entre Ázia Sudeste no Pasífiku. Liuhusi partisipasaun iha Horasis Visionary Circle 2026, iha Singapura.
Iha enkontru ne’e, ne’ebé Vickers Venture Partners ko-organiza ho tema Leading Through Uncertainty Prezidente Ramos-Horta partisipa iha diálogu ho grupu selesionadu husi empresáriu no lider negósiu internasionál sira, hodi diskute kona-ba lideransa, kredibilidade no visaun ba futuru iha mundu ne’ebé hasoru incerteza ekonomia no jeopolítika.
Prezidente Ramos-Horta hatudu katak pozisaun jeográfika no dezenvolvimentu Timor-Leste fó oportunidade ba nasaun atu hametin ligasaun entre Ázia Sudeste no Pasífiku, liuliu iha área investimentu, enerjia, turizmu no dezenvolvimentu sustentável.
“Timor-Leste hamriik iha fatin úniku, la’ós de’it hanesan nasaun foun ne’ebé konsolida nia demokrasia, maibé mós hanesan ponte potensiál entre dinamizmu Ázia Sudeste no potensiál boot Pasífiku,” dehan Prezidente Liu husi komunikadu ne’ebe STL asesu husi Media Prezidente Repúblika Segunda (07/09/2026).
Ramos-Horta hateten, nia hateten mós katak Timor-Leste agora buka diversifika ekonomia no hamenus dependénsia ba rendimentu husi mina-rai no gás, liuhusi dezenvolvimentu setor sira seluk ne’ebé bele fó oportunidade ba investimentu no kresimentu ekonómiku sustentável.
Diskusaun iha Horasis Visionary Circle 2026 mós aborda panorama ekonomia globál iha tempu incerteza, papél Singapura ne’ebé kontinua muda iha ekonomia rejionál, responsabilidade no riku-soin, governasaun Inteligénsia Artifisiál (IA), no importánsia lideransa ne’ebé bazeia ba kapasidade umana.
Partisipasaun Prezidente Ramos-Horta iha enkontru ne’e mos reflete kompromisu Timor-Leste atu hametin konektividade rejionál no kooperasaun internasionál, enkuantu nasaun kontinua buka oportunidade foun ba dezenvolvimentu ekonómiku.
Horasis Visionary Circle 2026 sei kontinua to’o loron 6 Setembru, ho lider sira husi área negósiu, ekonomia no polítika internasionál atu troka esperiénsia no buka resposta ba dezafiu globál sira.
(eme)
