DÍLI, STLTIMORLESTE.com – Dili Institute of Technology (DIT) kontinua hametin kualidade ensinu liu husi aprendizajen, peskiza no servisu komunitáriu, atu kontribui ba dezenvolvimentu kapitál umanu iha Timor-Leste.
Lia hirak-ne’e hato’o husi Pro-Reitór Akadémiku DIT, Aderita M. T. dos Santos, ba STL iha knua DIT, Tersa (18/10/2026).
Nia esplika katak, universidade iha papél importante atu kontribui ba dezenvolvimentu kapitál umanu liuhusi edukasaun superior ho kualidade.
Maibé, nia observa katak, orsamentu ne’ebé Governu aloka kada tinan ba setór edukasaun seidauk sufisiente atu responde ba nesesidade dezenvolvimentu setór ne’e nian.
Maski nune’e, nia apresia apoiu Governu liuhusi Ministériu Ensinu Superior, Siénsia no Kultura (MESSK), ne’ebé durante tinan rua ikus tulun setór edukasaun no universidade sira liuhusi programa subvensaun públika no bolsu estudu husi Fundu Dezenvolvimentu Kapitál Umanu (FDCH) estudante sira.
Nia dehan katak, universidade sira presiza iha misaun no vizaun ne’ebé klaru atu orienta juventude ba futuru no prepara rekursu umanu ne’ebé bele kontribui ba dezenvolvimentu nasaun.
“Vizaun DIT klaru tebes, atu lori kualidade edukasaun ne’ebé ami oferese habelar, la’ós de’it iha Timor-Leste, maibé mós iha mundu globál. Misaun no vizaun ne’e sai parte importante husi universidade privadu sira-nia papél,” nia afirma.
Nia subliña katak, universidade privadu sira iha rekursu no oportunidade ne’ebé bele dezenvolve liután, liuliu bainhira hetan apoiu husi Governu no setór seluk. Ho apoiu ne’e, universidade sira bele hametin sira-nia kontribuisaun ba edukasaun nasionál.
Nia kontinua katak, DIT fó prioridade ba área prinsipál tolu, mak ensinu no aprendizajen, peskiza no servisu komunitáriu, hodi asegura katak universidade la’ós de’it fó koñesimentu ba estudante sira, maibé mós kontribui ba komunidade.
“Investimentu maka’as iha prosesu aprendizajen ba estudante sira no iha área peskiza importante tebes atu hametin kualidade edukasaun no dezenvolve rekursu umanu iha nasaun,” nia dehan.
Relasiona ho garantia kualidade, nia esplika katak DIT kontinua kumpre padraun kualidade nasionál ne’ebé dezenvolve husi Ajénsia Nasionál ba Avaliasaun no Akreditasaun Akadémika (ANAAA), liuhusi relatóriu kona-ba progresu ensinu, aprendizajen, peskiza no servisu komunitáriu.
Nia afirma katak, DIT hetan akreditasaun nível A durante tinan tolu tuir malu.
Akreditasaun ne’e, tuir nia, reflete esforsu instituisaun nian atu hametin sistema edukasaun ne’ebé apoia ensinu, peskiza no servisu ba komunidade.
Aleinde ne’e, DIT mós investe iha dezenvolvimentu rekursu umanu, liuliu dosente sira, ne’ebé nia afirma katak iha kualifikasaun akadémika nível mestradu no doutoramentu.
Investimentu ne’e atu asegura katak estudante sira hetan koñesimentu ho kualidade iha prosesu aprendizajen.
Iha área infraestrutura, nia hateten katak, maski DIT hasoru limitasaun oioin, instituisaun ne’e kontinua esforsu atu dezenvolve fasilidade akadémika, inklui konstrusaun edifísiu foun ba Eskola Negósiu.
DIT mós planeia atu harii laboratóriu ba área enjenaria iha tinan oin, atu nune’e estudante sira bele hetan apoiu prátiku iha prosesu aprendizajen.
Aleinde dezenvolve infraestrutura iha kampu prinsipál, DIT planeia atu habelar programa estudu ba kampu rejionál, inklui DIT Baucau no DIT Creo atu habelar asesu ba edukasaun superior no kontinua hametin kualidade ensinu iha Timor-Leste.
(joa)
