DILI, STLTIMORLESTE.com – FALINTIL -Forsa Defeza Timor-Leste (F-FDTL) no delegasaun defeza Portugal diskute hametin kooperasaun bilateral, liuliu iha dezenvolvimentu kapasidade militár no rekursu umanu.
Tuir komunikadu imprensa F-FDTL ne’ebé STL asesu, reuniaun ne’e hala’o iha Sala Reuniaun CEMGFA, tersa-feira (27/10/2026).
Vise-Xefe Estadu-Maior Jenerál F-FDTL, Major-Jenerál Calisto Santos Coliati, lidera reuniaun ho Diretór-Jerál Planeamentu no Polítika Defeza Nasionál (DGPDN) Portugal no reprezentante Ministériu Defeza Portugal.
Sorumutu ne’e foka ba área prioridade kooperasaun defeza, inklui ospitál militár, komunikasaun, Komponente Aérea Lizeira no Unidade FALINTIL.
Parte rua mós diskute programa formasaun, kapasitasaun militár no dezenvolvimentu Sentru Lian Portugés, hodi hasa’e kualidade rekursu umanu F-FDTL.
Kooperasaun ne’e importante atu hametin kapasidade institusionál no operasionál F-FDTL, liuliu iha área defeza ne’ebé sai prioridade ba Timor-Leste.
Reuniaun ne’e mós sai oportunidade atu haforsa relasaun institusionál entre F-FDTL no instituisaun defeza Portugal, hodi kontinua dezenvolve parseria bilateral.
Enkontru ne’e mós hetan partisipasaun Adjuntu Xefe Estadu-Maior Jenerál, Komandante Komponente Aérea Lizeira, Xefe Gabinete CEMGFA, Xefe Gabinete V-CEMGFA no reprezentante Divizaun Planeamentu.
(jen)
