DÍLI, STLTIMORLESTE.com – Komersiante balun iha Dili kontinua mantein presu sasán nesesidade bázika tanba fa’an hela stok tuan, enkuantu sasán foun balun aumenta folin.
Xefe Armajen Loja Basukmai, Joanico de Jesus Cardoso, hateten katak presu sasán balun seidauk muda, tanba loja kontinua fa’an stok ne’ebé sosa ho folin antigu.
Nia esplika katak, loja aumenta presu fa’an entre US$ 0,25 no US$ 0,50 de’it, depende ba folin ne’ebé distribuidór sira aplika ba sasán foun.
“Hanesan fó-s 25 kilograma ne’ebé ami sosa US$ 12, ami fa’an fali US$ 12,25. Aumentu depende ba folin ne’ebé distribuidór sira fó,” dehan Joanico ba STL iha Tasi-Tolu, Tersa-feira (27/10/2026).
Nia hatutan katak, fó-s 25 kilograma ne’ebé sosa US$ 12,75, loja fa’an US$ 13. Fó-s 20 kilograma ne’ebé sosa US$ 9,50, fa’an US$ 9,75.
Joanico afirma katak presu sasán depende ba folin sosa husi distribuidór. Se folin sosa nafatin, loja mós mantein presu fa’an, maibé se folin sosa sae, loja aumenta presu tuir montante ne’ebé razoável.
Nia hateten katak, situasaun hanesan ne’e mós akontese ba bee-midar, minuman ABC no Bintang, ne’ebé presu fa’an depende ba folin ne’ebé distribuidór entrega.
Ba terigu, loja sosa ho folin US$ 15 no fa’an US$ 15,50. Maibé, presu masin midar saku 50 kilograma ne’ebé nia temi presiza verifikasaun tanba númeru presu ne’ebé hato’o la hanesan.
Joanico hatutan katak iha períodu finadu, sasán ne’ebé konsumidór sosa barak inklui lilin, dosi, fó-s no ai-fuan.
Nia esplika katak, folin lilin depende ba kuantidade. Lilin 50 pakote fa’an US$
10,25, enkuantu lilin 40 pakote fa’an US$ 10.
Joanico dehan katak, iha loron balun, loja bele hetan vendas to’o US$ 10.000, depende ba demanda konsumidór no sasán ne’ebé disponivel.
Konsumidór Natersia dos Santos hateten katak aumentu presu sasán balun seidauk todan demais, tanba aumenta entre US$ 0,25 de’it.
“Hau sente di’ak tanba presu sasán la sae maka’as. Sasán hanesan fó-s, mina, manutolun, terigu no minuman aumenta oituan de’it,” dehan Natersia.
Nia hatutan katak, presu sasán la hanesan iha loja hotu. Loja balun kontinua mantein presu tanba stok tuan, enkuantu loja seluk aumenta folin tanba sosa stok foun ho folin aas.
Ihá sorin seluk tuir informasaun neebe diariu nee asesu husi Trabalhadór Loja JR mós informa katak, loja sei mantein presu stok tuan, maibé sasán foun ne’ebé tama hahú Tersa-feira (27/10/2026) bele hetan aumentu presu entre US$0,25 no US$ 0,50.
Iha loja balun iha Kampung Baru, presu lilin kaixa ho unidade 40 ka 50 fa’an entre US$ 9, US$ 10 no US$ 10,25, depende ba loja.
Presu fó-s no sasán seluk mós varia. Fó-s Folsom 20 kilograma fa’an US$ 16, fó-s Tali Merah 25 kilograma US$ 15, no fó-s Manu Victoria 25 kilograma US$ 12,25.
(dom)
Sasán seluk ne’ebé fa’an iha área ne’e inklui masin midar 2,5 kilograma US$ 2,80, Bimoli litru lima US$ 7,25, Mie Sedaap mutin US$ 6,70 to’o US$ 6,75, no terigu 25 kilograma US$ 15 to’o US$ 15,50.
