DILI, STLTIMORLESTE.com – Primeiru Ministru (PM), Kay Rala Xanana Gusmão fó boas-vindas ba Diretor-Jerál Organizasaun Mundiál Saúde (OMS), Dr. Tedros Adhanom Ghebreyesus, no partisipante Sesaun 79.º Komité Rejionál OMS ba Sudeste Aziátiku, ne’ebé hala’o iha Timor-Leste.
Xanana Gusmão hato’o mensajen ne’e iha abertura Sesaun 79.º Komité Rejionál OMS ba Sudeste Aziátiku, Segunda (07/09/2026).
Nia hatete katak, simu partisipante sira iha Timor-Leste nu’udar priviléjiu no onra boot, liuliu tanba enkontru ne’e importante ba kooperasaun iha área saúde iha rejiaun.
“Iha ita-nia kultura, simu konvidadu signifika fahe ita-nia uma, ita-nia ai-han, ita-nia kultura no ita-nia moris ho ema seluk,” dehan Xanana.
Nia hein katak partisipante sira durante sira-nia hela iha Timor-Leste sei hetan esperiénsia di’ak no oportunidade atu aprende kona-ba povu, kultura no istória Timor-Leste.
Xefe Governu hatete, Timor-Leste iha patrimóniu kultura no memória hosi jerasaun ba jerasaun ne’ebé forma identidade no karakter povu.
Nia mós subliña katak povu Timor-Leste liu hosi konflitu no difikuldade barak, maibé família no komunidade sira kontinua hametin esperansa no luta ba independénsia.
Ho apoiu hosi komunidade internasionál, Timor-Leste restaura independénsia iha 2002 no, desde ne’ebá, kontinua harii instituisaun no haforsa servisu públiku.
Xanana hatete katak Governu iha vizaun atu hadi’a saúde no elimina moras sira liuhosi planu dezenvolvimentu longu-prazu.
Nia subliña katak dezenvolvimentu sustentável depende ba dezenvolvimentu ema hotu, inklui investimentu iha edukasaun, kapasidade umana no saúde públika.
“Saúde di’ak la’ós objetivu ida mesak, populasaun saudável bele ajuda hamenus pobreza, aumenta produtividade no kontribui ba prosperidade nasional,” dehan nia.
Xanana mós hatete, Timor-Leste halo ona progresu importante iha setor saúde. Iha 2024, nasaun ne’e atinji eliminasaun filariose linfátika nu’udar problema saúde públika.
Nia konsidera realizasaun ne’e nu’udar rezultadu hosi kompromisu nasional, kooperasaun internasionál, apoiu parseiru dezenvolvimentu, esforsu profisionál saúde no partisipasaun komunidade.
Governu Timor-Leste, tuir Xanana, kompromete atu kontinua fornese servisu saúde ho kualidade ba povu hotu, liuhosi profisionál saúde ne’ebé iha kapasidade no infraestrutura adekuadu.
(dom)
