DILI, STLTIMORLESTE.com – Funsionáriu Prezidénsia Repúblika ohin presta homenajen ba preladus nain 4, neebe kontribui boot ba Igreja no povu Timor-Leste durante istoria.
Homenajen nee halao iha Kapelina Tasi Tolu, Dili, ba preladus nain haat, mak Dom Jaime Garcia Goulart, Dom José Joaquim Ribeiro, Monsenór Martinho da Costa Lopes no Dom Alberto Ricardo da Silva.
Asesor Prinsipal Prezidente Repúblika, Alexandrino Xavier de Araújo hatete katak, tuir orariu neebe Komisaun prepara, iha tuku 09.00 dader, funsionáriu husi Prezidénsia Repúblika mai Kapelina Tasi Tolu atu presta homenajen ba preladus nain 4.
Nia esplika katak, Prezidente Repúblika, José Ramos-Horta la partisipa diretamente iha atividade nee tanba iha agenda seluk iha dader loron 7 Setembru 2026.
Tanba nee, funsionariu tomak hahú husi Diretór Jerál no estrutura sira hotu iha Prezidénsia, marka prezensa atu presta homenajen.
Alexandrino hatete, homenajen nee konsidera hanesan responsabilidade no obrigasaun ba sidadaun Timor-Leste, tanba preladus nain 4 iha papel importante iha istoria nasaun no iha vida espiritual povu TL.
“Ba Bispu nain 4 merese no obrigasaun atu presta homenajen, tanba ho prezensa Bispu nain 4 neebe ho istória naruk Timor nian, sira sai mata dalan hodi fo naroman no tulun ba prosesu rai doben Timor-Leste, neebe ohin ita sai nasaun independente,” dehan Alexandrino ba jornalista sira iha Tasi Tolu, Segunda (7/09/2026).
Nia mos salienta katak, homenajen nee laos deit husi Prezidénsia, maibe reprezenta apresiasaun husi povu Timor-Leste tomak ba preladus sira neebe konsidera nuudar herói nasaun no herói espiritual, tanba sira nia servisu ba isin no klamar povu.
Iha fatin hanesan, Prezidente Tribunal Rekursu, Afonso Carmona hatete katak, funsionáriu tomak husi Tribunal Rekursu marka prezensa atu presta homenajen ikus ba preladus nain 4.
Afonso hatete, preladus sira iha kontribuisaun boot ba Igreja no Timor-Leste, liu liu liu husi servisu pastoral no orasaun ba povu durante períodu difísil iha istória nasaun.
“Tanba nee ita fe ba Igreja, tanba sira husik hela istória ida iha tempu funu, dehan Afonso.
Entretantu, Ministru Asuntu Kombatentes Libertasaun Nasional (MAKLN), Gil Oan Soru, hatete katak Ministériu ne’e lori apresiasaun no agradese ba preladus nain haat, liuhusi naran veteranu no kombatente sira.
Nia hatete katak, Dom Jaime Garcia Goulart, Dom José Joaquim Ribeiro, Monsenór Martinho da Costa Lopes no Dom Alberto Ricardo da Silva, nu’udar lider Igreja Katólika, iha kontribuisaun importante iha vida espiritual no sosial povu Timor-Leste.
Ministru Gil Oan Soru subliña katak orasaun no servisu Igreja nian la haree deit ba ema neebe luta ka partisipa diretamente iha rezisténsia, maibé ba sidadaun hotu, liu liu iha tempu difísil.
Homenajen ba preladus nain 4 ne’e sai parte husi tributu nasional ba lider Igreja Katólika sira ne’ebé iha períodu diferente sira, kontribui ba preservasaun fiar, esperansa, solidariedade no identidade espiritual povu Timor-Leste.
(joa)
