DILI, STLTIMORLESTE.com — Hospital Nasional Guido Valadares (HNGV) loke rekrutamentu 478 vaga saúde, inklui médiku, enfermeiru, parteira no tékniku aliadu, husi dia 7 to’o 17 Setembru.
Komunikadu imprensa neebe diariu nee asesu husi media
HNGV, Segunda nee (07/09/2026) hatete, HNGV liuhusi Diresaun Servisu Administrasaun, Finansas no Logístika, Departamentu Rekursu Umanus, anúnsiu rekrutamentu ba Funsionáriu Públiku Kareira Rejime Espesial, ho total 478 vaga iha kategoria 14.
Vaga sira inklui médiku jeral A/1 hamutuk 112, enfermeiru jeral júnior A/1 hamutuk 236, enfermeiru jeral júnior B/1 hamutuk 14 no asistente enfermajen hamutuk 30.
Ba parteira, HNGV loke 25 vaga ba parteira profisionál júnior A/1 no 10 vaga ba parteira profisionál júnior B/1.
Enkuantu ba tékniku aliadu saúde ka TDTSP, vaga sira mak tékniku radiolojia 10, tékniku análize laboratóriu 4, tékniku análize banku ran 3, tékniku fisioterapia 2, tékniku biomediku 3, tékniku nutrisaun 3, tékniku rekordu médiku 4 no tékniku farmásia 5.
HNGV mós determina kór mapa dokumentus tuir kategoria kandidatu. Médiku uza mapa verde, enfermajen azul, parteira mean, tékniku aliadu/TDTSP kinor, asistente enfermajen laranja no asistente TDTSP chocolate.
Diretór Servisu Apoiu Diagnóstiku no Terapêutiku HNGV, Vidal de Jesus Lopes, hatete katak prosesu rekrutamentu sei hala’o liuhusi koordenasaun entre Ministériu Saúde, HNGV no Komisaun Funsaun Públika.
Nia hatete anúnsiu públiku ba vaga sira sei publika husi 7 to’o 17 Setembru 2026, no kandidatu sira bele submete dokumentus atu partisipa iha prosesu seleksaun.
“Prosesu rekrutamentu ne’e sei enfatiza prinsípiu transparénsia, meritokrasi no igualdade, ho objetivu atu evita favoritismu ka interferénsia iha seleksaun kandidatu,” dehan Vidal.
Tuir nia, prosesu seleksaun sei hala’o iha faze tolu, mak seleksaun dokumentus, teste eskrita no entrevista. Teste eskrita sei hala’o liuhusi sistema Funsaun Públika, ho kandidatu ida-idak halo teste liuhusi komputador.
Vidal hatete kandidatu ne’ebé pasa faze hotu sei konsidera tuir rezultadu no kriteria ofisiál. Requisitos no kriteria ba vaga sira sei publika atu públiku bele asesu no komprende prosesu.
Nia esplika katak, HNGV presiza aumenta rekursu umanu tanba nesesidade servisu iha área saúde. Nune’e, Timor-oan hotu ne’ebé kumpre kriteria sei hetan oportunidade hanesan atu aplika.
Graduada husi Universidade Nasional Timor Lorosa’e, Amino Cunha, hatete katak nia graduadu ona maibé seidauk hetan servisu permanente.
“Hau hein kleur ona. Durante ne’e, hau halo voluntáriu deit iha ospitál no klinika sira, maibé seidauk sai fungsionáriu permanente. Ho rekrutamentu ne’e, hau mos hakarak tuir hotu,” dehan nia.
Nia hein katak, prosesu rekrutamentu sei lao ho justisa no transparénsia, atu Timor-oan hotu ne’ebé iha kualifikasaun bele kompete ho igualdade.
(dom)
