DILI, STLTIMORLESTE.com — Prezidente Tribunal Rekursu, Afonso Carmona afirma katak, Francisco José Ly Nicolau iha direitu atu konkore ba vaga Juiz iha Supremu Tribunal Justisa (STJ), desdeke priense hotu rekezitu ne’ebé estabelese iha prosesu rekrutamentu.
Deklarasaun ne’e mai, depois públiku sira hato’o preokupasaun liuhusi postajen iha Facebook kona-ba kandidatura Francisco José Ly Nicolau ba vaga Juiz STJ, inklui alegasaun katak Prezidente Repúblika, José Ramos-Horta sei nomeia nia ba Prezidente STJ.
Afonso Carmona rejeita preokupasaun ne’e no hateten katak prosesu rekrutamentu tenke lao tuir regra no rekezitu ne’ebé estabelese ona.
“Problema saida? Laiha problema. Sé mak dehan iha problema? Ne’e ita halo regra, hatama formuláriu, no agora júri mak termina atu haree sé mak bele tuir ka lae,” dehan Afonso Carmona ba jornalista sira iha Tasi-Tolu, Segunda-feira, 7 Setembru 2026.
Tuir Afonso Carmona, sidadaun Timor-Leste hotu-hotu iha direitu atu konkore ba vaga Juiz iha Supremu Tribunal Justisa, desdeke sira kumpre rekezitu ne’ebé determina ona.
Nia enfatiza katak la bele taka oportunidade ba sidadaun ida ne’ebé kumpre rekezitu no iha direitu atu partisipa iha prosesu seleksaun.
“Labele taka ema nia direitu. Sé mak priense regra no tuir, pasa ne’e pasa. Ida ne’e mak justisa. Agora, ita taka malu ne’e mak sai problema,” afirma Afonso Carmona.
Nia mos dehan katak prosesu rekrutamentu Juiz STJ tenke aplika ba ema hotu ho prinsipiu justisa no igualdade, tanba kandidatu sira tenke liuhusi prosesu seleksaun ne’ebé hanesan.
“Buat hotu Timor-oan hela. Ita labele taka dalan ba ema ida no taka oportunidade ba ema ida, tanba ne’e direitu ema nian. Kuandu nia konkore no la liu, ne’e buat seluk, maibé oportunidade atu konkore tenke justu,” nia hatutan.
Antes ne’e, jurista Jose Maria Guterres husu públiku atu tau konfiansa ba júri ne’ebé responsável ba prosesu seleksaun, atu bele hala’o prosesu ho independente no justu.
“Tau konfiansa ba júri sira. Husik sira hala’o servisu no fiar katak sira bele hala’o seleksaun ho diak, atu ema ne’ebé sei tur iha STJ tenke iha kapasidade diak atu hala’o servisu,” dehan Jose Maria Guterres.
Nia hateten katak membru STJ tenke iha kapasidade no kompeténsia ne’ebé diak, atu bele hala’o knaar tuir lei no kontribui ba dezenvolvimentu justisa iha Timor-Leste.
Enkuantu akademiku UNTL, Sebastião dos Santos, afirma katak STJ nu’udar instánsia judisiál aas liu iha sistema judisiál, ne’ebé iha knaar atu foti desizaun ikus iha kazu sira ne’ebé tama iha nia jurisdisaun.
Tanba ne’e, nia konsidera ema ne’ebé sei ocupa pozisaun iha STJ tenke iha kapasidade no integridade, no hala’o knaar tuir lei.
“STJ mak instánsia aas liu no foti desizaun ikus. Tanba ne’e, sé de’it mak ba tur iha ne’ebá, tenke hala’o knaar tuir lei haruka,” dehan Sebastião dos Santos.
(ter)
