BAUCAU, STLTIMORLESTE.com – Programa Merenda Eskolar iha Munisípiu Baucau ne’ebé antes hasoru atrazu tanba prosesu administrativu no aprovasaun alokasaun orsamentu, hahú la’o fali ona.
Diretór Servisu Munisípal Edukasaun Baucau, Afonso dos Santos da Costa aprezenta, programa merenda eskola iha Munisípiu Baucau para, hafoin remata ezame segundu periodu anu letivu ne’e, ne’ebé paradu kuaze fulan ida resin, maibé liuhusi esforsu sira iha loron 07 Setembru ne’e hahú la’o ona iha nivel eskola.
“Ita nia prosesu ne’e tarde iha administrasaun nian, maibé ita agradese, komesa segunda-feira horseik ita komesa la’o fali ona programa merenda eskolar,” hatete Afonso dos Santos da Costa ba STL iha Vila Nova Baucau, Tersa (08/09/2026).
Atrazu implementasaun programa ne’e akontese tanba iha eskola 16 ne’ebé tarde hetan aprovasaun no alokasaun orsamentu husi Ministériu Finansas ba implementasaun Programa Merenda Eskolar.
Maibé, liuhusi prosesu submisaun karta justifikasaun husi Servisu Munisípal Edukasaun Baucau, liuhusi Autoridade Munisípal Baucau ba Ministériu Finansas, finalmente konsege hetan solusaun no alokasaun orsamentu ba programa refere.
Programa Merenda Eskolar iha Munisípiu Baucau planeia atu hala’o durante loron efetivu 150 iha tinan letivu 2026.
Husi total loron efetivu ne’e, konsege implementa ona loron 70, ne’ebé kobre primeiru no segundu períodu, atual sei iha tán loron efetivu 80 atu kompleta implementasaun iha terseiru períodu.
Afonso hatete, tempu loron 80 sei sufisiente atu kompleta implementasaun programa ne’e. Maibé, ho konsiderasaun ezame nasionál, bele iha mudansa iha númeru loron implementasaun no uza orsamentu.
“80 loron ba períodu ne’e sufisiente atu ita atinji, maibé iha ezame nasionál ne’ebé ita hare’e ona, karik iha impaktu, osan restu ita devolve fila fali ba kofre Estadu,” hatete nia.
Dadus ne’ebé antes STL hetan hatudu katak, estudante benefisiáriu Programa Merenda Eskolar ba tinan letivu 2026 iha Munisípiu Baucau liu husi 34.000 estudante, kompostu hosi nivel Pré-Eskolar, Ensinu Baziku Primeiru Siklu, Segundu Siklu no Terseiru Siklu.
Programa ne’e iha orsamentu total US$2,788,690, ho planu implementasaun durante loron efetivu 150.
(tom)
