DILI, STLTIMORLESTE.com — Prezidente Repúblika (PR), José Ramos-Horta reafirma relasaun bilaterál ho Alemaña, hodi selebra aniversáriu dala 36 Unidade Alemaña nian.
Iha selebrasaun ne’ebé hala’o iha sexta-feira, 23 Outubru 2026, Prezidente Ramos-Horta hato’o kongratulasaun ba governu no povu Alemaña nian, iha Timor-Leste nia naran.
Ho tema “Forsa Barak, Nasaun Ida”, Prezidente destaka reunifikasaun Alemaña iha 1990 nu’udar símbolu liberdade, demokrasia no autodeterminasaun.
Nia afirma katak, esperiénsia rekonsiliasaun Alemaña nian hatudu katak divizaun istórika bele supera liuhusi diálogu, korajen no kompromisu ba pás.
Iha ninia diskursu, Xefe Estadu hato’o agradeseimentu ba solidariedade Alemaña nian, ne’ebé apoia luta Timor-Leste nian antes independénsia.
Alemaña hahú fó asisténsia dezenvolvimentu ba Timor-Leste iha 1999, ho montante totál maizumenus millaun 67 euro, inklui finansiamentu tomak ba ró Nakroma no apoiu ba setór marítimu no agrikultura.
Prezidente mós lembra ninia relasaun diplomátika ho Europa, inklui inisiativa atu nomeia Uniaun Europeia ba Prémio Nobel da Pás, ne’ebé nia konsidera susesu.
Haree ba futuru, Ramos-Horta subliña nesesidade atu hametin kooperasaun bilaterál, liuliu iha área enjenharia, teknolojia no inovasaun ambientál.
Nia konsidera kooperasaun ne’e importante atu diversifika ekonomia Timor-Leste nian no responde ba dezafiu rejionál, inklui mudansa klimátika.
Prezidente mós liga kooperasaun ne’e ho preparasaun Timor-Leste nian atu asume prezidénsia ASEAN iha 2029.
Iha remata, Ramos-Horta reafirma kompromisu atu hametin parseria istórika ho Alemaña, hodi promove prosperidade mútua no dezenvolvimentu sustentável ba nasaun rua.
(eme)
