DILI, STLTIMORLESTE.com – Prezidente Republika (PR), José Ramos-Horta kondekora Grau Kolar Orden Timor-Leste ba Diretor-Jeral no Eis Diretor Rejionál Organizasaun Mundial Saúde.
Prezidente Repúblika Ramos-Horta iha loron Segunda loraik (07/09/2026) kondekora Grau Kolár Orden Timor-Leste nian ba Tedros Adhanom Ghebreyesus, Diretór-Jerál Organizasaun Mundiál Saúde nian, Poonam Khetrapal Singh, Eis Diretór Rejionál Organizasaun Mundiál Saúde ba Sudeste-Aziatiku.
Serimónia kondekorasaun ne’e hala’o durante jantar gala ne’ebé hala’o iha Palásiu Nobre iha Lahane, nu’udar parte hosi sesaun Komité Rejionál OMS nian ba dala 79.º. Serimónia ne’e subliña Timor-Leste nia kompromisu kle’an ba parseria globál no valór komún kona-ba saúde, dignidade, no solidariedade umana.
Prezidente Ramos-Horta kondekora Grau Kolár orden Timor-Leste ba Dr. Poonam Khetrapal Singh tuir Dekretu Prezidente Repúblika No.102/2026, nu’udar rekoñesimentu ba ninia kareira distinta iha saúde públika iha nível nasionál no internasionál, no mós papél signifikativu ne’ebé nia hala’o durante ninia mandatu nu’udar Diretora Rejionál Organizasaun Mundiál Saúde nian ba Sudeste Aziatiku hodi promove kobertura saúde universál, prevene no kontrola moras sira, hametin kapasidade atu responde ba emerjénsia saúde públika, no hasa’e kooperasaun ho Estadu-membru sira Rejiaun nian, partikularmente ho Repúblika Demokrátika Timor-Leste.
Tuir Dekretu Prezidente Repúblika No.103/2026, Prezidente Ramos-Horta kondekora Grau Kolar orden Timor-Leste ba Dr. Tedros Adhanom Ghebreyesus, nu’udar rekoñesimentu ba ninia distintu kareira profisionál no institusionál no ninia papél signifikativu, nu’udar Diretór-Jerál Organizasaun Mundiál Saúde nian, iha lidera esforsu internasionál sira hodi promove saúde global, prevene no responde ba emerjénsia saúde públika, hametin sistema saúde no haburas kooperasaun internasionál. Ninia dedikasaun fó benefísiu ba ema barak iha tinan hirak nia laran, inklui sidadaun Timor-Leste no reprezenta kontribuisaun signifikativu ida ba umanidade ne’ebé merese hetan rekoñesimentu estadu nian.
“Ohin, ita bele oferese tan buat seluk evidénsia kona-ba saida mak parseria bele alkansa. No apropriadu katak ita hahú ho rekoñesimentu ba pesssoal na’in-rua ne’ebé nia lideransa kontribui maka’as ba parseria ne’e. Dr. Tedros, Timor-Leste sente onradu konfere ba ita Grau Kolár Orden Timor-Leste nian, nu’udar rekoñesimentu ba ita-nia lideransa ba Organizasaun Mundiál Saúde nian, ita-nia kontribuisaun ba saúde globál no no Ita-nia servisu ba humanidade. Ita-nia lideransa durante emerjénsia saúde grave balun iha ita-nia tempu, Ita-nia kompromisu ba sistema saúde ne’ebé forte no Ita-nia esforsu hodi halibur nasaun sira fó benefísiu ba ema iha mundu tomak, inklui povu Timor-Leste.” Dehan PR Horta.
Alende ne’e Poonam Khetrapal Singh, Timor-Leste mós sente onradu hodi konfere ba ita ho Grau Kolar Orden Timor-Leste nian.
“Durante dékada sira servisu públiku nian, no durante ita-nia lideransa iha OMS Sudeste Aziátiku, ita defende kobertura saúde universál, sistema saúde ne’ebé forte, prevensaun no kontrolu ba moras, no preparasaun ba emerjénsia saúde públika. Ita fortalese kooperasaun entre OMS no nasaun sira iha Rejiaun ne’e. Ami-nia sidadaun barak mak hetan ona benefísiu husi serbisu ne’e, no ohin loron Estadu rekoñese ita-nia servisu distinta. Onra sira-ne’e mós espresa Timor-Leste nia apresiasaun ba parseria ne’ebé hamutuk ho ami durante dékada rua resin,” katak nia.
Prezidente Ramos-Horta hato’o nia esperansa katak onra ne’e sei inspira kooperasaun internasionál ne’ebé kontinua hodi harii mundu ida ne’ebé saudavel no ekuitativu ba ema hotu.
(eme)
