DILI, STLTIMORLESTE.com – Funsionáriu públiku ne’ebé atinji ona idade 65 tenke tama ba reforma obrigatóriu, tanba reforma ne’e aplika tuir desizaun ne’ebé foti ona iha tinan 2025.
Informasaun ne’e hato’o husi Prezidente Komisaun Funsaun Públika (KFP), Agostinho Letencio de Deus ba jornalista sira iha Salaun Ian Martin, Balide, Tersa nee (08/09/2026).
“Ko’alia kona-ba reforma, depois iha 2025 deside ona reforma obrigatóriu. Entaun kuaze kada fulan iha ema ida ka rua tama ba reforma. Numeru ne’e la boot, maibé akontese kuaze kada fulan tanba ema ida-idak iha tinan no fulan ne’ebé diferente atu atinji idade 65,” nia esplika.
Agostinho hateten katak, bainhira funsionáriu atinji ona idade 65, nia tenke reforma, independentemente husi fulan ne’ebé nia atinji idade ne’e.
Ba área edukasaun, nia hateten dadus kompletu kona-ba numeru profesores ne’ebé tama ba reforma seidauk iha nia liman, maibé iha fulan hirak liu ba, ema liu 1.000 ona simu pensaun reforma.
Nia hateten katak, profesores ne’ebé tama ba reforma presiza servisu hamutuk ho Seguransa Sosiál atu bele simu pensaun kada fulan.
Nunee mos Diretor Servisu Edukasaun Munisipál, Patricio da Costa Magno, hateten katak professores ne’ebé atinji idade reforma identifika liu husi sistema Rekursu Umanu iha ME no KFP.
“Kona-ba profesores reforma nian, uluk ita submete ona dadus ba Ministeriu Edukasaun. Tinan ida ne’e, hahu husi fulan Setembru ba leten, sei iha professores ne’ebé atinji idade reforma, maibé ita seidauk hatene loos professor nain hira mak sei tama ba reforma,” nia esplika.
Patricio hateten katak, agora prosesu identifikasaun professores ne’ebé tama ba reforma hala’o automaticamente liu husi sistema, la’ós hanesan uluk ne’ebé presiza submete dokumentus reforma.
“Agora husi Rekursu Umanu ME no KFP mak identifika professores sira ne’ebé tama ba reforma liu husi sistema,” nia dehan.
Nune’e mos Superintendente Edukasaun Munisípiu Dili, Cesarina Correia Guterres, hateten katak rekrutamentu foun husi ME bele ajuda prenxe no substitui fatin professores ne’ebé tama ona ba reforma.
“Ita-nia profesores balun tama ona ba reforma tanba idade. Nune’e, ho rekrutamentu ne’ebé ME halo, bele substitui fali professores reforma nian fatin,” nia komenta.
Enkuantu ne’e, Diretor Eskola Sekundária Jerál Públiku 5 de Maio Becora, Julio Maia Castro de Jesus, hateten katak agora iha professores na’in rua iha sira-nia eskola ne’ebé tama ona ba reforma no la ativu ona iha prosesu ensinu no aprendizajen.
“Ita-nia professores na’in rua ne’e, ida hanorin matéria Portugés no ida hanorin Temas. Sira reforma iha idade 65, nune’e sira reforma tiha ona no la ativu ona iha eskola,” nia haktuir.
Entretantu, Diretor Nasionál Rekursu Umanu iha ME, Joao Amaral, hateten katak nia sei okupadu ho servisu no seidauk bele fó komentáriu kona-ba asuntu ne’e ba media. Nia promete atu fó konfirmasaun bainhira bele kontaktu ho diresaun ne’ebé responsavel.
(jac)
