BAUCAU, STLTIMORLESTE.com – Sekretariadu Tékniku Administrasaun Eleitoral (STAE) Munisípiu Baucau seidauk koloka funsionáriu na’in 18 ba Postu Administrativu neen (6) iha Munisípiu Baucau, tanba ekipamentu ba rejistu kartaun eleitorál seidauk kompletu.
Diretor STAE Baucau, Natividade Freitas Guterres aprezenta katak, STAE rekruta ona funsionáriu na’in 24, kompostu pontu fokal, operador no assistente, ne’ebé iha fulan Agostu 2026 hetan formasaun espesífika husi ekipa nasionál.
Funsionáriu hirak ne’e planeia atu destaka ba Postu Administrativu ualu (8) iha Munisípiu Baucau, hodi fasilita atendimentu rejistu kartaun eleitorál besik liu ba komunidade.
Maibé, hafoin remata formasaun, STAE Munisípiu Baucau foin destaka funsionáriu na’in neen ba Postu Administrativu Baguia no Venilale, ho kada postu simu funsionáriu na’in tolu, kompostu pontu fokal ida, operador ida no assistente ida.
“Foin mak ita koloka uluk iha Postu Baguia no Venilale. Atu halo atendimentu ba postu seluk, ita sei hein semana rua ka tolu tan, mak ita foin desloka,” hateten Natividade ba STL iha nia knaar-fatin, Vila Nova Baucau, Tersa (08/09/2026).
Nia esplika katak razaun prinsipál tanba seidauk bele koloka funsionáriu ba Postu Administrativu neen seluk mak ekipamentu seidauk kompletu, inklui blanku, ribon no laptop ne’ebé operador sira presiza atu halo rejistu identidade eleitorál iha sistema.
Tuir Natividade, ekipamentu hirak ne’e agora iha ona prosesu transportasaun husi kompaña fornesedora ne’ebé halo kompras iha rai-li’ur.
Bainhira ekipamentu hirak ne’e to’o iha nivel nasionál, sei atribui ba STAE Munisípiu Baucau atu distribui no instala iha Postu Administrativu sira ne’ebé seidauk iha ekipamentu no funsionáriu.
“Tuir informasaun husi nasionál, dehan semana tolu tan ekipamentu sei to’o ona. Ami hein de’it. Se semana tolu ne’e ekipamentu kompletu ona, ami sei desloka funsionáriu sira ne’e ba postu,” Natividade akresenta.
Nia salienta katak, maski funsionáriu na’in 18 seidauk hetan deslokasaun ba Postu Administrativu neen, maibé funsionáriu hirak ne’e nafatin apoia servisu iha STAE Munisípiu Baucau fó atendimentu ba eleitores sira.
Natividade hateten, bainhira ekipamentu to’o no kompletu ona, STAE sei halo kolokasaun funsionáriu sira ne’e ba Postu Administrativu ne’ebé seidauk iha funsionáriu STAE.
Iha sorin seluk, eleitor husi Postu Administrativu Laga, Paul Ximenes, husu ba STAE no kompaña fornesedora ekipamentu atu aselera prosesu transportasaun no distribuisaun ekipamentu.
Nia dehan, eleitores husi Postu Administrativu Baguia no Venilale komesa ona hetan atendimentu rejistu kartaun eleitorál iha nivel postu, enkuantu eleitores husi Postu Administrativu seluk tenke mai diretamente iha STAE Munisípiu Baucau.
Kondisaun ne’e, tuir Paul, bele hamosu difikuldade ba eleitores sira, tanba distánsia husi postu administrativu ba STAE Munisípiu dook.
“Ita dehan lori atendimentu besik ba povu, maibé atendimentu ne’e sei dook husi povu. Tanba ne’e ami husu, se ekipamentu seidauk to’o, diak liu STAE Munisípiu ho ekipamentu ne’ebé iha halo uluk atendimentu móvel iha sub-distritu ne’ebé STAE nia ema seidauk iha,” hateten Paul.
Nia husu atu STAE konsidera atendimentu móvel hanesan solusaun temporáriu, enkuantu hein ekipamentu no funsionáriu sira atu koloka iha Postu Administrativu neen seluk.
(tom)
