DILI, STLTIMORLESTE.com – Governu gasta Orsamentu Jeral Estadu (OJE) ba festa boboot ho jantar konfraternizasaun iha rai laran no rai liur hatudu katak Governu haksolok, povu terus, tanba taxa kiak sae ho velosidade 71%.
Kona-ba asuntu ne’e, Deputadu Bankada FRETILIN, Antoninho Doutel Sarmento hatete, Governu la iha seriedade atu kombate kiak.
Tanba tuir nia loron-loron iha festa boboot, jantar konfraternizasaun iha fatin-fatin, iha rai liur ema ba hemu champanhe, iha rai laran halo lansamentu oioin iha otel 5 star. Osan OJE gasta hotu ba catering, dekorasaun, aluga tenda boot, selu artis atu kanta. Tiba-tiba taxa kiak sae ho velosidade 71%.
“Hau rekomenda ba Governu atu hapara kultura festa boboot no jantar konfraternizasaun iha rai liur no rai laran ne’ebe gasta osan povu nian, no tenke transfere kedas osan sira ne’e ba programa kombate kiak, seguransa alimentar no kria kampu servisu iha area rural, molok taxa kiak sae to’o 100%,”dehan Deputadu Antoninho ba STL, iha Díli, Tersa nee (08/09/2026).
Deputadu nee dehan, ironia boot mak Governu halo festa atu selebra susesu, maibe susesu ne’e povu la sente. Iha Dili ema dansa iha jantar konnfraternizasaun, maibe iha foho labarik la ba eskola tanba laiha osan atu sosa kadernh, inan aman la iha servisu, foos folin sae. Lansamentu projetu halo barak iha televizaun, maibe iha terrenu projetu la iha. Ne’e governasaun festa, la’os governasaun povu.
Iha parte ketak, Observador Politika, Manuel de Oliveira konsidera kritika ne’e pertinente tebes no reflete realidade sosial atual. Tuir nia, bainhira Governu gasta osan barak ba festa no serimonia protokoler, maibe la investe iha setór produtivu sira hanesan agrikultura, peska no indústria kiik, maka rezultadu mak taxa kiak sei sae nafatin.
Entretantu, Akademista UNTL, Santiago Vieira afirma katak dadus taxa kiak 71% ne’e sinál alerta seriu ba Estadu. Tuir nia, se Governu kontinua ho kultura festa no jantar konfraternizsaun, sei kria dezekilibriu sosial ne’ebe boot. Nia sujere Governu tenke halo austeridade ba despeza festa no investe barak liu iha edukasaun, saúde no agrikultura.
(car)
