DILI, STLTIMORLESTE.com — Embaixada Xina iha Timor-Leste asina Memorandu Entendimentu (MoU) ho Assosiasaun Café Timor (ACT), ho apoiu finanseiru ¥100.000, equivalenti ho aproximadamente US$ 14.000, atu apoia promosaun no dezenvolvimentu kafe Timor-Leste.
Prezidente ACT, Daniel Leong hatete, osan ne’e sei uza hodi promove kafe Timor-Leste iha expo no merkadu China, inklui atividade promosaun iha Shanghai.
Nia hatete, apoiu husi Embaixada Xina importante atu ajuda prodútór sira hasa’e kualidade no kuantidade produsaun kafe, nune’e bele aumenta oportunidade ba kafe Timor-Leste iha merkadu internasionál.
Daniel mós relata katak, iha tinan kotuk nia partisipa iha China International Import Expo no haree interese boot husi konsumidór China ba kafe Timor-Leste, liuliu tanba nia kualidade.
“Hau espera ho ajuda husi Embaixada Xina ne’e, Assosiasaun sei ajuda no suporta mos konsumidór atu produs kafe ho kualidade aas liután,” dehan Daniel iha edifísiu ACT, Fatuhada, Dili, Tersa (08/09/2026).
Nia hato’o agradeseimentu ba Embaixada Xina tanba apoiu ne’ebé fó ba ACT no to’os-na’in sira, no promete atu kontinua servisu hodi dezenvolve setor kafe.
Konselheiru Ekonomia no Komérsiu Xina, Zhao Suocheng, hatete apoiu ¥100.000 ba ACT hanesan kontinuidade kooperasaun entre Xina no Timor-Leste iha área kafe.
Zhao hatete Embaixada Xina sei kontinua suporta ACT atu partisipa iha feira no expo internasionál iha China, inklui atividade sira ne’ebé bele promove kafe Timor-Leste nu’udar produtu organiku no autentiku.
Tuir nia, kooperasaun entre Xina no Timor-Leste mós inklui formasaun, apoiu ekipamentu ba prosesamentu kafe no atividade sira atu hasa’e kualidade no produtividade.
Diretór-Jerál Ministériu Komérsiu no Indústria, Jorge Pereira, konsidera kafe hanesan ida hosi produtu primadóna Timor-Leste ne’ebé iha potensiál boot atu kompete iha merkadu internasionál.
Nia hatete Governu apresia apoiu Embaixada Xina ba asosiasaun no grupu produtór lokal, liuliu iha promosaun produtu Timor-Leste ba merkadu Xina.
Jorge subliña katak dezenvolvimentu setor kafe la’ós de’it kona-ba promosaun, maibé presiza mós kolaborasaun ho Ministériu Agrikultura atu aumenta plantasaun, produsaun no kualidade kafe.
Nia mós husu Embaixada Xina atu kontinua fó apoiu ba ACT, liuliu iha preparasaun Timor-Leste atu sai uma-na’in ba atividade ASEAN iha 2029, hodi hasa’e oportunidade ba produtu lokal iha merkadu internasionál.
(dom)
