DILI, STLTIMORLESTE.com — Primeiru Ministru Interinu, Eng. Mariano Assanami Sabino, reprezenta PM Kay Rala Xanana Gusmão iha enkontru ho Xefe Ministra Northern Territory, Lia Finocchiaro, no delegasaun Australia, iha Palásiu Governu, Tersa (08/09/2026).
Primeiru Ministru Interinu, Eng. Mariano Assanami Sabino, hateten ba jornalista sira katak Xefe Ministra Northern Territory, Lia Finocchiaro, ho delegasaun, mai Timor-Leste atu hasoru Primeiru Ministru Kay Rala Xanana Gusmão. Maibé, PM Xanana Gusmão sei fila mai Timor-Leste aban.
“Hau ohin reprezenta PM Xanana atu simu vizita Xefe Ministra Northern Territory mai Timor-Leste. Ita iha konkordánsia lubuk ida, liuliu kona-ba oinsá hasa’e kapasidade no rekursu umanu, hametin kooperasaun di’ak entre Timor-Leste no Australia, liuliu mobiliza ita-nia joven no foin-sa’e sira atu servisu iha Northern Territory, tanba teritoriu ne’e besik ho Timor-Leste,” dehan nia.
Nia haktuir katak área sira seluk ne’ebé presiza hametin kooperasaun mak edukasaun, ensinu superiór no saúde. Nia konsidera Northern Territory nu’udar teritoriu ne’ebé besik liu Timor-Leste, nune’e komunikasaun no kooperasaun entre parte rua presiza kontinua hadi’a.
“Ita apresia Northern Territory tanba Timoroan lubuk ida servisu, buka moris no hela iha ne’ebá. Durante tempu invazaun, Timoroan barak mos hela iha ne’ebá. Tanba ne’e, ita nafatin hametin relasaun ho Australia,” afirma nia.
Nia mós lembra katak relasaun Timor-Leste ho Australia hahú ona durante períodu Segunda Guerra Mundial, bainhira Timoroan no Australia servisu hamutuk. Depois Timor-Leste restaura independénsia, Australia mós kontribui liuhusi forsa manutensaun dame atu fó seguransa ba povu Timor-Leste.
Iha oportunidade ne’ebá, Xefe Ministra Northern Territory, Lia Finocchiaro, reafirma kompromisu Australia atu hametin parseria ho Timor-Leste, liuliu iha área kapasidade, mobilidade traballador no dezenvolvimentu forsa-traballu.
Nia hateten katak Australia konsidera Timor-Leste nu’udar parseru internasionál ne’ebé besik no importante, liuliu ba Northern Territory, no hakarak kontinua dezenvolve relasaun entre nasaun no povu rua.
“Timor-Leste no Australia iha amizade ne’ebé naruk no duradoura, ho relasaun forte ne’ebé ami orgulhu tebes,” afirma Lia Finocchiaro.
Nia hateten katak vizita ba Timor-Leste importante atu hasoru Prezidente Repúblika no autoridade sira, hodi ko’alia kona-ba oportunidade atu hametin kooperasaun iha futuru.
Kooperasaun ne’e inklui esforsu atu hasa’e kapasidade no abilidade, dezenvolve forsa-traballu no hametin mobilidade traballador entre Timor-Leste no Australia.
“Obrigadu barak tanba simu hau iha ita-nia nasaun furak. Hau hein atu komprende liután kona-ba oinsá ita bele hametin servisu hamutuk iha futuru. Ami valoriza tebes relasaun ne’e no konsidera hanesan prioridade importante,” dehan Lia Finocchiaro.
Nia mós hateten katak Australia no Timor-Leste sei kontinua servisu hamutuk atu alkansa objetivu komún ba povu rua, inklui liuhusi akordu foun atu hametin parseria no estabelese grupu servisu ne’ebé sei trata prioridade no interese komún.
Tuir observasaun STL, hafoin enkontru ho Primeiru Ministru Interinu, Eng. Mariano Assanami Sabino, Xefe Ministra Northern Territory, Lia Finocchiaro, hala’o konferénsia imprensa iha Palásiu Governu kona-ba objetivu no rezultadu enkontru ne’ebé foin hala’o.
(jos)
