BAUCAU, STLTIMORLESTE.com – Implementasaun Programa Nasionál Dezenvolvimentu Suku (PNDS) tinan 2026 iha Suku tolu, Postu Administrativu Quelicai Antigu, Munisípiu Baucau, hatudu ona progresu di’ak.
Administrador Postu Administrativu Quelicai Antigu, Francisco Matias Gusmão “Junior”, aprezenta, PNDS tinan 2026 ne’e implementa iha Suku Afaça, Guruça no Namanei, ho tipu projetu diferente tuir nesesidade komunidade iha kada suku.
Iha Suku Afaça, PNDS implementa konstrusaun estrada rural ho beton ho naruk 270 metru, ne’ebé atende komunidade iha Aldeia Uecubuti no Borolai.
Enkuantu iha Suku Guruça, programa ne’e implementa konstrusaun estrada rural ho beton ho naruk 100 metru no konstrui moru protesaun, ne’ebé destina ba komunidade iha Aldeia Uadabotu, iha Suku Namanei PNDS implementa konstrusaun Sentru Komunitáriu iha Darenafa.
Junior hateten katak, implementasaun PNDS iha Postu Administrativu Quelicai Antigu la’o tuir prosesu no hein katak projetu sira hotu bele remata tuir tempu ne’ebé planeadu.
“PNDS iha Postu Administrativu Quelicai Antigu labele kestiona tan. Tanba tama fulan Novembru, projetu sira termina hotu ona. Tanba programa ne’e hahu kedas ita akompaña hela ho di’ak,” hateten Junior ba STL iha Vila Nova Baucau, Kuarta (09/09/2026).
Nia mós esplika katak, Suku Namanei tama ona ba enkontru progresu 58%, enkuantu Suku Guruça atinji liu ona 45%. Suku Afaça mós iha tempu besik sei atinji enkontru progresu 37%.
Tuir Autoridade Postu Administrativu Quelicai Antigu, implementasaun PNDS iha nível Suku fó impaktu diretu ba komunidade lokal, tanba komunidade envolve diretamente iha prosesu servisu no bele hetan oportunidade atu aumenta rendimentu.
Aleinde oportunidade ekonomia, infraestrutura ne’ebé harii liuhusi PNDS, liuliu estrada rural ho beton mós ajuda fasilita movimentasaun komunidade, inklui transporte públiku no privadu ba atividade ekonomia no nesesidade sosial sira.
Maibé, Junior hateten katak iha preokupasaun kona-ba orsamentu PNDS ne’ebé aloka ba Suku sira, tanba montante orsamentu ne’e kada tinan reduz.
“Maibé ne’e difisil ida, tanba nasaun ne’e nia ema barak. Saida mak Estadu fó ona ba ita, ita tenki halo jestaun iha kraik, oinsá bele koresponde ho nesesidade povu nian iha Suku no Aldeia sira,” nia hateten.
Entretantu, programa tolu ne’ebé implementa iha suku tolu refere kada programa hetan alokasaun orsamentu rihun US$ 30.
(tom)
