BAUCAU, STLTIMORLESTE.com – Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA, I.P.) destaka ona nia funsionáriu na’in sia (9) iha Munisípiu Baucau atu hala’o atividade inspesaun no fiskalizasaun ba rejiaun leste.
Inspetora-Jerál AIFAESA, Odete da Silva Viegas, hateten katak durante AIFAESA eziste, instituisaun ne’e seidauk destaka funsionáriu sira iha nivel munisípiu tanba limitasaun rekursu umanu, ekipamentu servisu no infraestrutura.
Nia konsidera, destakamentu funsionáriu iha Munisípiu Baucau sai nu’udar pasu importante atu aproxima servisu AIFAESA ba komunidade no atividade negósiu sira iha rejiaun leste.
“Ne’e eventu importante ida, tanba ita hahú destaka ona ita nia funsionáriu AIFAESA mai iha Baucau. Ekipa ida ne’e sei hala’o nia knaar hare’e ba rejiaun leste ne’ebé tama iha Baucau, Viqueque no Lautém,” hateten Odete da Silva Viegas ba jornalista sira, hafoin remata serimónia entrega funsionáriu iha Salaun Soimali, Vila Nova, Baucau, Tersa (08/09/2026).
Nia esplika, funsionáriu ne’ebé destaka iha Munisípiu Baucau hamutuk na’in sia kompostu tékniku no inspetór na’in lima, asistente na’in tolu no motorista na’in ida.
Funsionáriu sira ne’e sei suporta servisu AIFAESA iha área operasional, petrolizasaun no laboratóriu, ne’ebé sei liga ho atividade turizmu, komérsiu no indústria.
Inspetora-Jerál AIFAESA subliña katak ho ekipa ne’ebé destaka permanente iha Baucau, prosesu atendimentu no resposta ba keixa komunidade sei sai lalais liu, tanba antes ne’e ekipa husi Dili presiza halo deslokasaun ba munisípiu sira iha rejiaun leste.
“Ha’u hanoin servisu sei efetivu liu. Bainhira ami iha Dili hetan keixa, ekipa tenke desloka mai iha Baucau, Viqueque no Lautém. Maibé agora ekipa iha kedas ona 24 oras. Ita boot sira bele hato’o karik iha iregularidade ruma. Ami agradese ba Autoridade tanba disponibliza ona fatin ba ami.” Odete akresenta
Nia informa, kontestu Munisípiu Baucau nian, AIFAESA sei hetan apoiu husi Ekipa Jestaun Merkadu Munisípal no Servisu Alimentasaun atu hametin kontrolu no fiskalizasaun ba atividade negósiu, komérsiu no servisu alimentasaun iha munisípiu.
Nia espresa, destakamentu ekipa AIFAESA iha Baucau bele fasilita komunidade no operador negósiu sira atu hato’o keixa ka relata iregularidade diretamente ba autoridade kompetente, sem presiza no hein ekipa Nasionál.
Iha fatin hanesan, reprezentante Prezidente Autoridade Munisipál Baucau, atual Diretór Servisu Munisipál Administrasaun Baucau, Florindo Caetano Pereira, konsidera katak destakamentu funsionáriu AIFAESA iha Munisípiu Baucau sai nu’udar faze importante ida atu kontrola atividade negósiu liuhusi inspesaun no fiskalizasaun, liuliu ba aihan importadu ne’ebé fa’an iha loja no kios sira.
“Ami agradese tebes AIFAESA bele koloka nia ema mai iha Baucau atu halo inspesaun no fiskalizasaun ba aihan sira. Tanba ne’e, ita sei servisu hamutuk atu hadi’a liután kontrolu aihan ba higiene no saúde públika nian. Tanba ita nia komunidade, liuliu kios ki’ik sira, balu seidauk komprende di’ak. Dala ruma aihan lata balu prazu ona, maibé sira nafatin fa’an,” hateten Florindo.
Enkuantu Koordenadór AIFAESA.I.P. Rejiaun Leste, David Belarmino Soares, hateten katak ekipa ne’ebé destaka iha Munisípiu Baucau sei kobre servisu inspesaun no fiskalizasaun ba aihan importadu no produtu sira iha Baucau, Viqueque no Lautém.
Nia hateten, ekipa sei kumpri misaun AIFAESA atu garante direitu konsumidór sira nian no intensifika kontrolu ba aihan no produtu laos aihan sira ne’ebé faan iha rejiaun leste.
“Difikuldade ne’ebé ami hasoru mak, loloos ita nia ekipa tenke destaka iha munisípiu sira hotu, maibé tanba menus rekursu umanu, ami na’in sira ne’ebé destaka iha ne’e sei halo esforsu tomak hodi kobre to’o suku no aldeia, no mós munisípiu rua seluk,” hateten David.
(tom)
