DILI, STLTIMORLESTE.com – Governu no Igreja Katolika inagura Monumentu Jardim dos Memorial ba Preladus, Clerigos, Religiosos no Religiosas sira nia kontribuisaun ba Igreja no povu Timor-Leste.
Serimonia inagurasaun nee halao iha Katedral Dili, Kuarta nee (9/09/2026), no partisipa husi Bispu Maliana, Dom Norberto do Amaral, Bispu Baucau, Dom Leandro Maria Alves, reprezentante Santa Sé iha Timor-Leste, ADN Ministra Edukasaun, MOP, ADN no padre sira.
Prezidente Conferénsia Episcopal Timorense (CET), Sua Eminénsia Dom Virgílio Cardeal do Carmo da Silva, SDB, hatoo agradesimentu ba IX Governu Konstitusional, liuliu Primeiru-Ministru Kay Rala Xanana Gusmão, tanba nia inisiativa atu harii monumentu ida ne’e.
Dom Virgílio hatete, Primeiru Ministru rasik husu atu harii monumentu ne’e hodi sai fatin memória ba Preladus, amululik, religiosos no religiosas sira ne’ebé fó sira-nia kontribuisaun ba Igreja no povu Timor-Leste.
Nia esplika katak, tanba tempu limitadu, ekipa la konsege hetan fatin ne’ebé luan liu. Tanba ne’e, hili fatin iha área Katedral Dili, maski espasu ne’e ki’ik, atu monumentu bele harii no sai fatin ida ba memória.
Ikus mai, hotu-hotu konkorda atu hala’o konstrusaun monumentu ne’e. CET mós hatoo apresiasaun ba Governu tanba inisiativa, apoiu no kontribuisaun neebe IX Governu fó ba Igreja.
“Papel uma Kreda nian durante tempu difisil ukun rasik aan liu husi prezensa Preladus sira nian iha ita nia rain,” hatete Dom Virgílio.
Nia mós hato’o agradesimentu ba MAE neebe xefia obra ne’e hamutuk ho MOP, MPIE no ADN, liuhusi orientasaun téknika ba ekipa konstrusaun, hodi halo monumentu ne’e sai furak no apropriadu.
Dom Virgílio hatete, iha klaran monumentu nee iha mitra Bispu sira nian, no haleu Saudozu Bispu nain haat nia foto Saudozu.
Elementu sira nee hatudu kontinuidade husi lideransa Bispu ida ba Bispu seluk, iha istória Igreja Katolika iha Timor-Leste.
Nia hatete katak, monumentu nee laos deit atu hatudu imajen, maibe iha sentidu atu reflete identidade no natureza Igreja no povu TL.
Dom Virgílio mós hatoo agradesimentu ba ekipa tomak husi Kompania Haksolok, inklui traballador sira neebe servisu iha konstrusaun monumentu nee.
Iha plaka monumentu, tau biodata Preladus sira, hahu husi Primeiru Bispu, segundu, terseiru no kuartu, iha hun Cruz no mitra mos tau naran Bispu, padre no madre sira neebe mate no fo aan ba luta Timor-Leste.
Nia hatete katak, se iha naran balun seidauk tama iha plaka, iha oportunidade iha futuru atu kompleta lista naran sira neebe falta.
Iha ikus, Dom Virgílio rekomenda ba Amu Paroku, Vigáriu no Konsellu Pastoral atu assume responsabilidade hodi kontinua tau matan no kuida monumentu nee.
Nia apela ba sarani sira hotu neebe mai iha fatin nee atu uza monumentu hanesan fatin reza, vizita no aprende kona ba istória Preladus no Igreja iha TL.
Dom Virgílio mos husu ba ema hotu atu kolabora no fahe responsabilidade hodi kuida monumentu nunee bele matak, furak no prezerva nafatin ba jerasaun sira tuir mai.
Obra ba konstrusaun Monumentu Preladus hahu iha fulan Junho 2026 husi Empreza Haksolok.
(joa)
