DILI, STLTIMORLESTE.com – Programa Fundu Inkubasaun Negósiu sei apoia joven Timor-oan dezenvolve ideia inovativu sai negósiu sustentável no kria oportunidade empregu.
Programa ne’e hala’o husi Institutu Apoiu ba Dezenvolvimentu Emprezarial (IADE), ho apoiu husi Programa Nasaun Unidas ba Dezenvolvimentu (UNDP) no Ajénsia Kooperasaun Internasional Korea (KOICA).
Diretór Ezekutivu IADE, Filomeno Belo, hatete programa datoluk ne’e fó oportunidade ba joven feto no mane ho idade 18 to’o 35 tinan atu dezenvolve sira-nia ideia negósiu.
Programa ne’e foka liuliu ba joven husi Dili, Baucau, Likisá no Ermera. Maibé, rejistrasaun la limita de’it ba munisípiu haat ne’e.
“Programa ne’e fó oportunidade ba joven Timor-Oan sira ne’ebé iha ideia no interese atu envolve-an iha emprezarial, hodi hetan apoiu no tulun husi UNDP no IADE,” dehan Filomeno Belo ba Jornalista iha serimonia lansamentu programa fundu inkubasaun negosiu faze datoluk iha edifisiu IADE Mandarin, Kuarta (09/09/2026).
Nia hatete, benefisiáriu sira sei hetan formasaun no mentoría atu dezenvolve ideia, prepara planu negósiu no responde ba dezafiu sira iha área finansas, marketing no jestaun.
Filomeno mós informa, iha fase primeiru no segundu, programa ne’e envolve hamutuk 131 partisipante husi munisípiu haat. Husi total ne’e, benefisiáriu 64 hetan formasaun tan kona-ba oinsá hadi’a sira-nia negósiu.
Ba fase datoluk, programa sei foka ba área indústria, agrikultura no restorante. Rejistrasaun sei la iha limitasaun ba númeru kandidatu, tanba seleksaun sei determina montante benefisiáriu.
Reprezentante UNDP, Brigida Soares hatete, husi 725 partisipante ne’ebé partisipa iha formasaun, empreendedór 92 sei kontinua hala’o sira-nia negósiu ho ativu to’o agora.
“Iha programa inovasaun ne’e, ami haree ona oinsá ideia foun, bainhira hetan apoiu ne’ebé loos, bele dezenvolve sai negósiu susesu,” dehan Brigida.
Nia hatete, UNDP la fó de’it apoiu finanseiru, maibé investe mós iha abilidade, koñesimentu no dezenvolvimentu negósiu foun ne’ebé bele kria empregu no haforsa ekonomia nasional.
UNDP mós enkoraja kandidatu feto, ema ho defisiénsia no joven husi rejiaun hotu-hotu atu aplika ba programa ne’e.
Deputy Country Director KOICA, Taegun Kim hatete, programa inovasaun ne’e hahú iha 2022 no kontinua halibur Governu, parseiru dezenvolvimentu no komunidade atu kria oportunidade ekonomia ba joven sira.
Nia afirma, esperiénsia husi programa rua dahuluk sei sai baze ba programa datoluk, hodi fó oportunidade liután ba joven sira atu transforma ideia inovativu sai negósiu sustentável.
KOICA apoia programa ne’e ho orsamentu US$ 185,500.
Diretór Ezekutivu MCAE, Ezequiel da Costa Babo, afirma programa ne’e importante atu ajuda joven transforma ideia kreativu sai negósiu, kria empregu no kontribui ba dezenvolvimentu ekonomia nasional.
Nia hatete ideia mesak la sufisiente, tanba joven sira presiza asesu ba mentoría, orientasaun, merkadu no finansas atu bele dezenvolve negósiu.
“Ami komprometidu atu apoia prosesu tomak, hahú husi konsepsaun ideia to’o produsaun,” dehan Ezequiel.
Nia enkoraja joven sira atu komprende nesesidade konsumidór, aprende husi falhas no uza koñesimentu ne’ebé hetan husi programa atu kria negósiu ne’ebé sustentável.
(dom)
