DÍLI, STLTIMORLESTE.com — Federasaun Futebol Timor-Leste (FFTL) anunsia lista jogador na’in 23 ne’ebé sei reprezenta Timor-Leste iha kompetisaun FIFA ASEAN Cup 2026 Segundu Devizaun, ne’ebé sei realiza iha Hong Kong.
Anunsiu kona-ba lista jogador sira ne’e halo husi treinador prinsipál Seleksaun Nasional Timor-Leste, José Pedro Salazar iha konferénsia imprensa ne’ebé realiza iha sala konferénsia FFTL, Bairo de Gerilhos, Dili, Kuarta nee, 9 Setembru 2026.
José Pedro Salazar hateten katak, jogador na’in 23 ne’ebé tama iha lista seleksaun mai husi timor oan sira nebeagora dadaun iha klubu sira ne’ebé atualmente hala’o atividade futebol iha rai-laran no mos iha rai-li’ur, hanesan Portugal, Austrália, Indonézia no Malásia.
Entre jogador sira ne’ebé tama iha lista ne’e mak Alexandro Lima husi Santa Cruz FC, Eligio Oliveira husi Karketu FC, Luis Figo husi Santo António FC, Eric Silva husi JB Coimbra Portugal, Cladio Osório husi El Vachado Portugal, Gali Freitas husi Madura United, João Pedro husi Kucing FC Malaysia, no jogador sira seluk.
Treinador José Pedro Salazar mos hateten katak, ida husi obstákulu boot ne’ebé ekipa treinador sira hasoru iha prosesu hili jogador mak liga nasional futebol Timor-Leste ne’ebé la’o deit durante fulan rua.
Tuir nia, situasaun ne’e halo jogador sira la hetan oportunidade atu joga ho regularidade no la kompleta kompetisaun durante tempu naruk. Kondisaun ne’e konsidera nu’udar dezafiu ba ekipa seleksaun nasional.
José Pedro Salazar hateten katak, se liga nasional bele hala’o durante fulan neen to’o fulan sia ka fulan sanulu, sei fó oportunidade diak liu ba jogador sira atu dezenvolve sira-nia kapasidade no fasilita treinador atu hili jogador ho preparasaun ne’ebé diak.
Nia mos espera katak, iha futuru FFTL bele servisu hamutuk ho Ministériu Juventude, Desportu, Arte no Kultura (MJDAC) atu hadi’a sistema no kontinuidade kompetisaun futebol iha Timor-Leste.
Enkuantu Diretór Dezenvolvimentu Futebol no Seleksaun Nasional, João Maneco, ka El Micholay hateten katak, FFTL sei kontinua esforsu atu rezolve obstákulu sira ne’ebé afeta dezenvolvimentu futebol nasional, inklui problema kompetisaun liga nasional.
João Maneco hateten katak, FFTL sei fó atensaun ba dezenvolvimentu akademia, kompetisaun juvenil no Under-17, no mos buka kooperasaun ho organizadór liga atu kria sistema kompetisaun ne’ebé adekuadu.
FIFA ASEAN Cup 2026 Segundu Devizaun sei hahú iha loron 24 Setembru 2026 iha Hong Kong. Iha jogu dahuluk, Timor-Leste sei hasoru Myanmar, antes iha jogu daruak hasoru Kambódia.
Timor-Leste nia participasaun
FIFA ASEAN Cup – Divizaun 2 / Challenge Division: dala 1, iha 2026.
FIFA ASEAN Cup – Divizaun 1 / Premier Division: 0 dala. Timor-Leste iha 2026 tama Divizaun 2, hamutuk ho Kambódia no Laos iha Grupo B.
Kompetisaun 2026 ne’e rasik mak edisaun dahuluk, la’ós torneiu ne’ebé ona iha edisaun sira antes. Iha FIFA ASEAN Cup 2026, Timor-Leste sei joga Myanmar iha 24 Setembru no Kambódia iha 30 Setembru, iha Hong Kong.
(leo)
