DILI, STLTIMORLESTE.com — Desizaun Tribunal Supremu Victoria atu arkiva kazu Lighthouse konsidera husi jurista Timor-oan sira hanesan desizaun importante ne’ebé fó valor ba soberania Estadu no interese Povu Timor-Leste (TL).
Jurista Sergio Dias Quintas hateten katak, desizaun Tribunal rai-liur ne’e reflete realidade Timor-Leste iha períodu ne’ebá, bainhira kompanhia estranjeira no ema estranjeiru balu supostamente aproveita frajilidade Timor-Leste hodi hetan benefísiu husi rekursu no riku-soin nasaun nian.
“Iha dekade ida liu ba, tantu kompanhia estranjeira no ema estranjeiru balu aproveita Timor-Leste nia frajilidade hodi bosok ba Timor-Leste nia riku-soin. Tanba ne’e, kestaun hanesan ne’e importante, no desizaun Tribunal ne’e fó valor no dignidade ba soberania Estadu no Povu Timor-Leste,” dehan Sergio ba STL iha Kaikoli, Kuarta nee (9/9/2026).
Nia hatutan katak Povu no Estadu Timor-Leste tenke kontinua hamutuk no firme hodi defende interese nasaun nian, liuliu kontra tentativa husi ema ka entidade estranjeira ne’ebé iha intensaun atu aproveita riku-soin Timor-Leste.
Iha sorin seluk, akademiku UNTL, Sebastiao Dos Santos mós apresia desizaun Tribunal Victoria ne’e no konsidera katak desizaun ne’e hatudu Timor-Leste kontinua lao ba oin.
“Apresia ba desizaun ne’e hatudu katak rai Timor lulik. Apresia ba desizaun ne’ebé iha, Timor kontinua lao ba oin,” dehan Sebastiao.
Nia subliña katak, importante ba futuru mak Timor-oan sira kontinua hadomi malu, servisu hamutuk no kontribui ba dezenvolvimentu nasaun, hodi Timor-Leste bele sai diak liu tan iha futuru.
(ter)
