DILI, STLTIMORLESTE.com – Prezidente Republika (PR), José Ramos-Horta ho kandidata ofisiál hosi Reinu Arábia Saudita ba Diretór-Jerál Organizasaun Mundiál Saúde (OMS), Hanan Balkhy, diskute konaba saúde públika iha Timor Leste.
Bainhira remata hasoru malu, kandidata ofisiál hosi Reinu Arábia Saudita ba Diretór-Jerál Organizasaun Mundiál Saúde (OMS), Hanan Balkhy ba jornalista sira iha Palasiu Prezidensial Nicolau Lobato, Bairo Pite, Kuarta (09/09/2026) hatete, sente ondradu mai hasoru malu ho Prezidente Republika José Ramos Horta iha Palasiu Prezidensial hodi deskute hamutuk konaba setór saúde públika nasionál.
Hanan Balkhy hatete, agora daudaun iha Díli iha ninia vizita dahuluk nian mai Timor-Leste hodi partisipa iha reuniaun Komité Rejionál OMS nian ba Sudeste Aziátiku.
Durante sira-nia enkontru, Prezidente Ramos-Horta no Hanan Balkhy halo revizaun ba progresu no aspirasaun dezenvolvimentu Timor-Leste nian, hodi fó énfaze ba susesu signifikativu sira ne’ebé atinje ona iha setór saúde públika nasionál.
Hanan Balkhy fahe ninia vizaun estratéjika hodi reforma OMS, ho foku ba efisiénsia organizasionál, harii fali konfiansa institusionál, no garante rezultadu saúde nian ne’ebé iha impaktu loloos ba estadu-membru hotu.
Hodi ko’alia kona-ba lisaun krusiál sira ne’ebé aprende hosi pandemia COVID-19, Hanan Balkhy fó importánsia ba nesesidade urjente atu hamenus dezigualdade globál iha área saúde nian. Nia reafirma ninia kompromisu atu haluan asesu ne’ebé justu no lalais ba diagnóstiku esensiál, ai-moruk, no vasina sira ba populasaun sira ne’ebé menus priviliéjiu, hodi espresa ninia dedikasaun atu servisu hamutuk besik liután ho Timor-Leste no rejiaun tomak hodi harii sistema saúde nian ne’ebé forte no reziliente.
(eme)
