DILI, STLTIMORLESTE.com – Prezidente Republika (PR), José Ramos-Horta kondekora Grau Insígnia Orden Timor-Leste nian ba Brian Jamison Fouss, Diretór Nasional Korpu ba Pás Estadus Unidus nian iha Timor-Leste, hodi rekoñese nia kontribuisaun durante ne’e.
Orden Timor-Leste mak nasaun nia onra aas liu, ne’ebé fó ba individuál sira ne’ebé hala’o ona servisu esepsionál no meritóriu ba nasaun. Brian Jamison Fouss simu Grau Insígnia tuir Dekretu Prezidente Repúblika No. 104/2026, nu’udar rekoñesimentu ba ninia kontribuisaun sira ne’ebé destakadu ba kooperasaun internasionál no ninia dedikasaun forte hodi hametin lasu amizade no troka entre Estadus Unidus no Timor-Leste.
Prezidente Republika José Ramos-Horta liu husi diskursu iha Palasiu Kuarta (09/09/2026) hatete, durante Fouss nia mandatu tinan lima nu’udar Diretór Nasional, Korpu ba Pás iha Timor-Leste harii hikas ho susesu nia programa sira hafoin pandemia COVID-19, hodi restaura servisu Voluntáriu hafoin ausénsia besik tinan tolu no simu grupu formasaun foun haat mai Timor-Leste. Iha nia lideransa, Korpu ba Pás haforsa ninia programa Edukasaun no Dezenvolvimentu Ekonómiku Komunitáriu no aprofunda ninia parseria ho Governu Timor-Leste, inklui liuhusi asinatura Memorandu Entendimentu ho Ministériu Edukasaun no Ministériu Komérsiu no Indústria.
Programa ne’e mós hametin kolaborasaun ho komunidade lokál sira, família uma-na’in sira, no parseiru dezenvolvimentu sira hasa’e formasaun ba voluntáriu sira, seguransa no protesaun, apoiu médiku, programasaun, no sistema administrativu sira; no kompleta ona revizaun programa ne’ebé kompriensivu hodi aliña di’ak liután servisu Voluntáriu ho Timor-Leste nia prioridade dezenvolvimentu nasionál no komunitáriu. Realizasaun sira-ne’e haforsa ona Korpu ba Pás Timor-Leste nia abilidade atu fó apoiu ba Voluntáriu sira no sira-nia omólogu Timor-oan sira no fó fundasaun sólidu ba programa ne’e nia servisu no parseria ne’ebé kontinua ho komunidade sira iha nasaun laran tomak.
“Hodi fó onra ba Sr. Fouss, ita fó onra ba espíritu solidariedade ne’ebé ultrapasa fronteira sira. Konsidera ninia kontribuisaun signifikativa ba hametin kooperasaun internasionál, notavelmente liuhusi ninia atividade sira iha Korpu ba Pás Estadus Unidus nian iha Timor-Leste no mós ninia dedikasaun hodi promove kooperasaun, interkâmbiu, no dezenvolvimentu relasaun entre povu sira, ninia kompromisu, no dedikasaun hodi hametin lasu amizade no kooperasaun internasionál. Méritu no servisu sira ne’ebé maka presta husi Sr. Fouss merese rekoñesimentu no apresiasaun husi ita-nia estadu,” dehan PR Horta.
Dezde hahu iha tinan 2002, Korpu ba Pás iha Timor-Leste parseria ho komunidade lokál no instituisaun governu hodi apoia prioridade nasionál sira liuhusi projetu primáriu rua: Edukasaun Inglés no Dezenvolvimentu Ekonómiku Komunitáriu. Voluntáriu sira hanorin hamutuk Inglés iha eskola sira, halo pilotu ba kurríkulu prátiku sira, no serbisu ho foin-sa’e sira, feto no na’in ba negósiu ki’ik sira hodi promove empreendedorizmu, literasia finanseira, no prontidaun ba serbisu. Sira mós aborda nutrisaun no apoia inisiativa sira ne’ebé orienta hosi komunidade liuhusi subsídiu ki’ik sira, enkuantu hela hamutuk ho família uma-na’in sira iha aldeia rurál sira.
(eme)
