DILI, STLTIMORLESTE.com — Banco Central Timor-Leste (BCTL) aprova lisensa definitiva ba Kaebauk, permitindu instituisaun finanseira ne’e sai banku komersiál iha Timor-Leste.
Konsellu Administrasaun BCTL aprova lisensa definitiva ba Kaebauk Investimentu no Finansas, S.A. (KIF), iha 9 Setembru 2026, depois instituisaun ne’e kumpre rekezitu hotu ne’ebé determina atu opera nu’udar banku komersiál.
Governador BCTL, Helder Lopes hatete, Kaebauk agora sai ona banku komersiál no sei kontinua dezenvolve servisu finanseiru hodi apoia ekonomia Timor-Leste.
“Nia sai ona banku komersiál. Nia uluk hanesan mikrofinansas, agora hetan lisensa nu’udar banku,” dehan Helder Lopes ba jornalista sira, depois remata halo lansamentu Relatóriu Ekonomia Timor-Leste 2026 kona-ba Períodu Médiu, iha Auditorium IOM, Fomentu II, Kinta (10/09/2026).
Helder hatete, Kaebauk kumpre rekezitu prinsipál sira ne’ebé BCTL determina, inklui rekezitu kona-ba kapital no digitalizasaun, antes lisensa definitiva fó.
Tuir nia, Kaebauk aplika lisensa ho kapital US$ 2 miliaun no transfere kapital ne’e ba konta própriu nu’udar parte hosi prosesu rekezitu lisensa bankária.
“BCTL haree hotu aspetu sira ne’e hodi fó lisensa ba sira, no iha tempu hanesan sira sai ona banku,” hatete nia.
Helder mos hatete, Kaebauk iha ona baze kliente ne’ebé boot no servi ona populasaun iha munisípiu hotu, inklui Rejiaun Administrativa Espesiál Oe-Cusse Ambeno (RAEOA).
Tuir dadus ne’ebé diariu nee asesu husi pajina Kaebauk, instituisaun ne’e iha liu 22,000 uma-kain ne’ebé simu kréditu to’o final 2025.
Total loan portfolio Kaebauk iha tempu ne’e liu US$ 45 miliaun, enkuantu reseita total durante 2025 liu US$10 miliaun.
Iha Dezembru 2025, Kaebauk iha liu 369 funsionáriu no opera 21 filial iha munisípiu 14 iha Timor-Leste.
Iha programa literasia finanseira, hamutuk 2,413 kliente partisipa iha 116 sesaun durante 2025, ne’ebé hala’o iha munisípiu 8.
Kaebauk mos aloka US$ 100,000 ba inisiativa inkluzaun finanseira.
Iha estrutura propriedade, acionista Kaebauk inklui Tuba Rai Metin (TRM), BOPA, International Finance Corporation (IFC) no TURAME Holdings. Tuir informasaun Kaebauk, TRM nu’udar acionista maioria, enkuantu IFC iha 12.5% no BOPA 16.5%.
Antes sai banku komersiál, BCTL klasifika Kaebauk Investimentu no Finansas, S.A. nu’udar Other Deposit-Taking Institution (ODTI/OIRD), ho númeru lisensa GBR No.39/2016.
(dom)
