BAUCAU, STLTIMORLESTE.com – Bainhira tinan 2026 remata, komunidade sira iha Postu Administrativu Quelicai Antigu, Munisípiu Baucau, asesu hotu ona enerjia eletrisidade.
Administrador Postu Administrativu Quelicai Antigu, Francisco Matias Gusmão “Junior”, hateten katak, durante tinan hirak liubá, komunidade sira iha área balun sirkuntansia Postu Quelicai Antigu nian, iha difikuldade atu asesu enerjia eletrisidade, tanba dook husi rin no fiu eletrisidade ne’ebé Eletrisidade TimorLeste (EDTL) instala. Situasaun ne’e afeta liuliu labarik estudante sira atu estuda iha tempu kalan.
Maibé, tinan 2026 ne’e, situasaun ne’e komesa muda depois Governu sentral fó atensaun ba nesesidade enerjia eletrisidade iha área refere, liuhusi implementasaun instalasaun liña eletrisidade ne’ebé hala’o husi kompaña lokal.
“Oras ne’e dadaun, iha nivel Quelicai Antigu, iha deit Aldeia Uadaboru ne’ebé tinan ida ne’e atu hotu ona. Iha tan bairo-bairo Suku Afaça, inklui mos Tequinomata, área baliza ho Afaterdor, tinan ida ne’e halo instalasaun ba liña eletrisidade. Ne’e hotu, komunidade iha Quelicai Antigu sei asesu ona eletrisidade iha loron no kalan,” Junior hateten ba STL iha Vila Antiga, Baucau, Kinta (10/09/2026).
Nia esplika katak instalasaun liña eletrisidade iha Aldeia Uadaboru, Suku Guruça, sei fó benefísiu ba komunidade sira iha área refere, inklui mos komunidade husi suku no aldeia seluk ne’ebé baliza ho Aldeia Uadaboru.
Enkuantu iha Suku Afaça no área baliza ho Suku Tequinomata, Postu Administrativu Laga, instalasaun liña eletrisidade sei fó benefísiu ba uma-kain 150 resin, ne’ebé hela besik liña eletrisidade, maibé durante tinan naruk seidauk asesu enerjia eletrika tanba laiha instalasaun apropriadu atu halo koneksaun ba uma.
“Agora kompaña sira iha ona terenu, sira nia material hanesan rin eletrisidade no fiu sira to’o ona, no akompaña husi komunidade sira komesa servisu ona iha Uadaboru. Maibé hela deit ona bairo, tanba ita sei halo ritual iha semana oin, hafoin kompaña sei kontinua hala’o servisu,” Junior akresenta.
Nia informa katak material instalasaun liña eletrisidade, inklui rin eletrisidade, to’o ona iha terenu Uadaboru hamutuk unidade 87, no kompaña estabesele ona unidade lima.
Instalasaun iha bairo sira iha Suku Afaça no área Tequinomata sei hein seremonia ritual, hafoin kompaña hahú servisu ba instalasaun fiu eletrisidade iha terenu.
Entretantu, projetu instalasaun liña eletrisidade iha Aldeia Uadaboru, Suku Guruça, responsabilidade husi kompaña Janicia Union, Lda., ho orsamentu US$ 105,370.96, projetu ne’e sei hala’o servisu to’o fulan Dezembru 2026.
(tom)
