DILI, STLTIMORLESTE.com — UNFPA sei hala’o programa foun tinan 5 iha Timor-Leste, ho prioridade ba saúde inan, planeamentu família, violénsia bazeia ba jéneru no dadus populasaun.
United Nations Population Fund (UNFPA) sei implementa programa foun iha Timor-Leste durante tinan lima, ho apoiu finanseiru hamutuk US$21.3 miliaun ba atividade sira ne’ebé konsidera prioridade.
Diretór Rejionál UNFPA ba Ázia no Pasífiku, Aleksandar Sasha Bodiroza, hato’o informasaun ne’e hafoin enkontru ho Vise-Primeiru-Ministru ba Assuntu Sosiál, Ministru Dezenvolvimentu Rural no Organizasaun Urbana, Mariano Assanami Sabino, iha Palásiu Governu, Kinta (10/09/2026).
Bodiroza hateten katak enkontru ho Vise-Primeiru-Ministru lao ho di’ak, no diskusaun foka ba projetu no atividade sira ne’ebé UNFPA sei apoia iha Timor-Leste.
“Programa foun ne’e apoia Governu Timor-Leste ho montante US$21.3 miliaun ba atividade tomak. Ohin ami ko’alia kona-ba atividade sira ne’ebé sei fó apoiu ba dezenvolvimentu rural, servisu saúde, setór edukasaun no dezenvolvimentu rede, ho objetivu atu hametin servisu no polítika públika iha Timor-Leste,” dehan Bodiroza ba jornalista sira.
Nia esplika katak programa tinan lima ne’e dezenvolve liuhosi ko’operasaun ho Governu Timor-Leste, ho prioridade ba nesesidade sira ne’ebé governu identifika atu hetan apoiu iha tinan sira oin mai.
Iha área saúde, programa fó prioridade ba saúde inan, planeamentu família, prevensaun no resposta ba violénsia bazeia ba jéneru, no uza dadus populasaun atu apoia dezenvolvimentu polítika públika.
Bodiroza hateten katak dadus demográfiku importante atu ajuda governu no instituisaun relevante sira komprende situasaun populasaun no dezenvolve polítika bazeia ba evidénsia.
Alende área saúde, UNFPA sei apoia mós dezenvolvimentu rural no setór edukasaun, ho objetivu atu hadi’a asesu komunidade ba servisu báziku no kontribui ba dezenvolvimentu sustentável.
Nia mós relata kona-ba konstrusaun ospitál ba inan isin-rua. Tuir nia, konstrusaun ospitál 10 remata ona iha Munisípiu Baucau no munisípiu sira seluk, enkuantu ospitál 18 sei kontinua prosesu finalizasaun.
Nia subliña katak apoiu US$21.3 miliaun ne’e sei uza durante tinan lima, ho foku ba saúde inan, planeamentu família no prevensaun violénsia hasoru feto.
“Ita la mai ho ita-nia programa rasik, maibé atividade sira ne’ebé hala’o tuir programa no pedidu ne’ebé mai husi Governu Timor-Leste,” afirma Bodiroza.
Iha enkontru ne’e, Vise-Primeiru-Ministru Mariano Assanami Sabino hato’o agradese ba UNFPA tanba kontinua suporta Governu Timor-Leste, liuliu iha área saúde no edukasaun.
“Hau sente kontente tanba kleur ona ita servisu hamutuk ho UNFPA nu’udar ajénsia Nasaun Unidas iha Timor-Leste. Tinan kotuk, ita hamutuk ho UNFPA kria ona instituisaun ida, naran Task Force, ne’ebé envolve ajénsia hotu iha laran atu ko’alia kona-ba saúde labarik sira,” dehan Mariano.
Mariano mós hato’o agradese ba Governu Japaun tanba fó apoiu ba UNFPA atu kontribui ba konstrusaun ospitál ba inan isin-rua sira iha Timor-Leste.
Hafoin enkontru, UNFPA entrega produtu kontraseptivu no medikamentu esensiál ba saúde inan no labarik ba INFPM/Eis-SAMES, iha edifísiu INFPM, Campo Alor, Dili.
(jos)
